Ümumdünya Səhiyyə Təşkilatı Gürcüstanı malyariyadan azad ölkə elan edib – bu haqda məlumatı Gürcüstanın Səhiyyə Nazirliyi yayır.

Ümumdünya Səhiyyə Təşkilatının Avropa Regional Bürosunun direktoru Hans Kluqe Gürcüstana malyariyadan azad ölkə statusu sertifikatının verilməsi münasibətilə təbrik edib.

“Təbrik edirəm, Gürcüstan. Bu nailiyyət davamlı sərmayələr, bütün malyariya hallarının qarşısının alınması, erkən aşkarlanması və effektiv şəkildə öhdəsindən gəlinməsində səhiyyə işçilərinin fədakar və məqsədyönlü səyləri nəticəsində əldə edilmişdir” – Kluqe qeyd edib.

Səhiyyə Nazirliyinin məlumatına əsasən, bu sertifikat ölkənin bütün ərazisində malyariyanın ötürülməsi zəncirinin ən azı son üç il ərzində qırıldığı təsdiqləndiyi təqdirdə verilir.

Səhiyyə naziri Mixeil Sarcveladzenin qeyd etdiyi kimi, malyariyadan azad ölkə elan edilməsi Gürcüstanın səhiyyə sisteminin davamlılığının növbəti etirafıdır. O, bu uğurun Gürcüstanın mühüm və ciddi çağırışların öhdəsindən gəlməyə qadir olması mənasına gəldiyini bildirib.

Ümumdünya Səhiyyə Təşkilatının Gürcüstan nümayəndəliyinin rəhbəri Gürcüstanın malyariyadan azad ölkə elan edilməsinə münasibət bildirib. Silviu Domente deyib, “Bu, malyariyanın aşkarlanması, diaqnostikası və müalicəsi istiqamətində nəhəng investisiya və çox iş idi”.

Gürcüstan ölkəni yerli malyariyadan azad kimi tanımaq və Ümumdünya Səhiyyə Təşkilatından sertifikat almaq üçün 2024-cü ilin avqustunda müraciət edib.