Ukrayna qüvvələri Novorossiyskdə rus sualtı qayığını partladıblar – bu haqda Ukraynanın Təhlükəsizlik Xidməti məlumat yayır.

Qurumun məlumatına əsasən, Ukrayna sualtı dronları Novorossiysk limanında “Varşavianka” sinifindən olan rus sualtı qayığını sıradan çıxarıblar.

“Sualtı qayığa ciddi ziyan dəyib və faktiki olaraq sıradan çıxarılıb” – Ukraynanın Təhlükəsizlik Xidməti tərəfindən yayılan bəyanatda deyilir.

Yayılmış videoya əsasən, partlayış sualtı qayığın gövdəsinin yaxınlığında baş verib. Yaxınlıqdakı rus gəmilərinə zərər dəyməyib.

Ukraynanın Təhlükəsizlik Xidmətində bəyan edirlər ki, sualtı qayığın göyərtəsində Ukraynaya hücumlar üçün istifadə edilən “Kalibr” tipli qanadlı raketlərin buraxılış qurğuları olub.

Ukraynanın xüsusi xidmət orqanlarında “Varşavianka” tipli sualtı qayığın dəyərini 400 milyon dollar olaraq qiymətləndirirlər.

Rusiya Qara dəniz Donanmasında sualtı qayığın zərər gördüyünü inkar edirlər. Bununla yanaşı, Rusiya Müdafiə Nazirliyində ukraynalıların Novorossiysk limanında diversiya təşkil etmək cəhdini təsdiqləyiblər.

Məlumat üçün bildirək ki, 2025-ci ilin payızından Ukrayna dəniz dronları ilə Novorossiysk limanında yerləşən neft terminallarına dəfələrlə zərbə endirib. Bu limanda Rusiya Qara dəniz Donanmasının hərbi bazası yerləşir.