Ukraynanın İsraildəki səfiri Yevgeni Korniçuk İsrail Xarici İşlər Nazirliyinə çağırılıb. Buna səbəb onun baş nazir Benyamin Netanyahunu tənqid etməsi olub. Netanyahu bildirmişdi ki, onun Vladimir Putinlə müntəzəm əlaqəsi var.

İsrail Xarici İşlər Nazirliyinin məlumatına görə, Ukrayna səfiri nazirliyin Avrasiya məsələləri üzrə baş direktorunun müavini Yuval Fuksun yanına irad bildirmək üçün dəvət edilib.

Fuks ukraynalı diplomatla görüşdə bildirib ki, onun şərhləri tamamilə yolverilməzdir və diplomatik protokola uyğun gəlmir.

Nazirliyin bəyanatında əlavə olunur ki, səfirin açıqlamaları Ukraynada müharibə başlayandan bəri İsrailin nümayiş etdirdiyi aydın mövqeni nəzərə almır. Bu mövqe İsrailin xarici işlər naziri Gideon Saarın Kiyevə səfərində və İsrailin BMT-də müxtəlif sənədlərin lehinə səs verməsində də göstərilib.

Yevgeni Korniçuk Benyamin Netanyahunun bəyanatını Ynet nəşrinə verdiyi müsahibədə tənqid etmişdi. Knessetdə 8 dekabrda keçirilən debatlarda Benyamin Netanyahu Vladimir Putinlə şəxsi münasibətlərindən danışaraq demişdi ki, onunla müntəzəm ünsiyyətdədir və bu, İsrailin həyati maraqlarına xidmət edir.

Ynet-ə müsahibəsində Korniçuk İsrailin baş nazirini sərt tənqid edib və bildirib ki, Netanyahu-nun şərhləri onu təəccübləndirib, xüsusilə də İsrailin 7 oktyabrda yaşadıqlarını nəzərə alanda. Səfirin sözlərinə görə, tarixdə doğru və mənəvi tərəfdə durmaq vacibdir.