Ukraynanın Müdafiə Nazirliyi bildirir ki, Rusiya Belarusda “Oreşnik” raket sistemi ilə silahlanmış 101-ci raket briqadasını yerləşdirib

Rusiya Belarusda “Oreşnik” raket sistemi ilə silahlanmış 101-ci raket briqadasını yerləşdirib. Bu barədə Ukrayna Müdafiə Nazirliyinin Baş Kəşfiyyat İdarəsinin rəhbəri Oleq İvaşşenko bildirib.

İvaşşenkonun sözlərinə görə, Ukrayna Belarus ərazisində radio siqnalı retranslyatorlarının yerləşdirilməsindən narahatdır. Bu retranslyatorlar Rusiyanın “Şahid” tipli pilotsuz uçuş aparatlarını Ukraynanın mülki obyektlərinə və kritik infrastrukturuna yönləndirir.

Oleq İvaşşenko qeyd edib ki, əgər Belarus belə bir icazə verməyibsə, bu, Minskın artıq Rusiya qüvvələrinin öz ərazisindəki fəaliyyətinə nəzarət etmədiyini göstərir.

Ukrayna Müdafiə Nazirliyinin Baş Kəşfiyyat İdarəsinin rəhbərinin sözlərinə görə, Rusiya rəhbərliyi Belarusun Ukraynaya qarşı müharibəyə birbaşa cəlb edilməsinə, Belarus ərazisindən və hərbi resurslarından istifadə etməklə Ukraynaya qarşı hərbi əməliyyatların coğrafiyasının genişləndirilməsinə çalışır.

“Lakin hazırda Belarusun Ukraynaya qarşı müharibəyə qoşulmağa hazırlaşdığını göstərən heç bir əlamət yoxdur. Belarusdan ölkəmizə yönələn hərbi təhlükənin səviyyəsi aşağı qiymətləndirilir”, – deyə İvaşşenko vurğulayıb.