Ukraynanın iqtisadiyyat naziri – Minerallar haqqında yeni sazişin müzakirəsi üçün Ukrayna gələn həftə Vaşinqtona nümayəndə heyəti göndərəcək

Minerallar haqqında yeni sazişin müzakirəsi üçün Ukrayna gələn həftə Vaşinqtona nümayəndə heyəti göndərəcək. Bu haqda Ukraynanın iqtisadiyyat naziri Yuliya Sviridenko “Associated Press”ə açıqlayıb.

“ABŞ-dan gələn yeni saziş layihəsi göstərir ki, hələ də fondun yaradılması və ya birgə investisiya qoyuluşu niyyəti mövcuddur” – Sviridenko bildirib.

Kiyevin nümayəndə heyətində iqtisadiyyat, xarici işlər, ədliyyə və maliyyə nazirliklərinin nümayəndələri olacaq.

“Hazırda əlimizdə olan ABŞ-nin Xəzinədarlığının hüquq komandasının mövqeyini əks etdirən sənəddir. Bu, yekun variant deyil, bu, birgə mövqe deyil” – Ukraynanın iqtisadiyyat naziri qeyd edir.

Sviridenko bildirib ki, tərəflər danışıqlar masası arxasında əyləşməli və dialoqu davam etdirməlidirlər.

“Biz sazişin yekun layihəsinin danışıqlardan sonra strateji maraqlarımıza tam uyğun olmasına çox fokuslanmışıq – Sviridenko bildirib.