Ukraynanın Hərbi Hava Qüvvələrinin məlumatına əsasən, gecə ərzində Rusiya Ukraynanın bir neçə bölgəsinə 100 pilotsuz uçuş aparatı ilə hücum həyata keçirib və Ukrayna onlardan 65-ni vurmağa nail olub

Ukraynanın Hərbi Hava Qüvvələrinin məlumatına əsasən, gecə Rusiya Ukrayna istiqamətində 100 pilotsuz uçuş aparatı ilə hücum həyata keçirib və Ukraynanın Müdafiə Qüvvələri onlardan 65-ni vura bilib.

Odessa, Kiyev, Sumi, Poltava, Çerkassi, Çerniqov və Xarkov bölgələrinə hücum həyata keçirilib.

Rus pilotsuz uçuş aparatlarının hücumu nəticəsində özəl müəssisələrə, infrastruktur obyektlərinə, yaşayış binalarına və fərdi evlərə ziyan dəyib.

Odessa bölgəsində hücum nəticəsində azı 4 nəfər yaralanıb. Evlərə, məktəb binasına və avtomobillərə ziyan dəyib.

Xarkovun meri İqor Terexov dronun vurulması nəticəsində Novobavarski rayonunda yanğın baş verdiyini bildirib. Yanğının söndürülməsi işləri bu vaxtadək davam edir.

“Shahed” tipli pilotsuz uçuş aparatı mülki müəssisənin ərazisinə düşüb. Bura ağac fabriki idi. Zərbədən sonra müəssisədə istifadə olunan qaz borusu zədələnib və irimiqyaslı yanğın əmələ gəlib” – Terexov qeyd edib.