Ukraynanın Ali Radası əcnəbilərə və vətəndaşlığı olmayan şəxslərə silahlı qüvvələrdə zabit kimi xidmət etməyə icazə verən qanun layihəsini qəbul edib

Ukrayna mediasının məlumatına əsasən, Ukraynanın Ali Radası əcnəbilərə və vətəndaşlığı olmayan şəxslərə müqavilə ilə silahlı qüvvələrdə zabit kimi xidmət etməyə icazə verən qanun layihəsini qəbul edib.

Qanun layihəsini 276 deputat dəstəkləyib. Ukraynanın müdafiə naziri Rustem Umerovun dediyi kimi, “Rusiyanın təcavüzünə qarşı iki il yarım davam edən müharibədə çoxlu əcnəbi Ukrayna Müdafiə Qüvvələrinə qoşulub və onlar döyüş meydanında mürəkkəb tapşırıqları effektiv yerinə yetirmək bacarıqlarını sübut ediblər”.

“Bu gün Ukraynanın Ali Radası Müdafiə Nazirliyi tərəfindən hazırlanmış mühüm qanun qəbul edib və bu qanun Ukrayna Silahlı Qüvvələrində, Dövlət Xüsusi Nəqliyyat Xidmətində və Milli Qvardiyada müqavilə əsasında xidmət edəcək əcnəbilərin sayının artmasına yol açır” – Ukraynanın müdafiə naziri bildirib.

Umerov bildirib ki, bundan əvvəl əcnəbilər yalnız sıravi əsgər və çavuş kimi xidmət edə bilirdilər.

“Yeni qanun ordumuzun potensialını gücləndirir” – Umerov qeyd edib.

Qanun layihəsinin izahat qeydində qeyd olunub ki, qanunvericiliyin tamamlanması zərurəti Ukrayna Silahlı Qüvvələrinin və digər hərbi hissələrin döyüş tərkibinin əhəmiyyətli dərəcədə artırılmasını tələb edən döyüş təmas xəttində yaradılmış mürəkkəb əməliyyat şəraiti ilə əlaqədar yaranıb.