Ukraynanın Ali Radası Denis Şmiqalın müdafiə naziri təyin olunmasını dəstəklədi. 450 üzvdən ibarət parlamentin əksəriyyəti, 267 üzv Şmiqalın namizədliyini dəstəkləyib.

Şmiqal etimada görə Ukrayna Prezidenti Volodimir Zelenskiyə təşəkkür edib və qeyd edib ki, müharibə vaxtı Müdafiə Nazirliyinə rəhbərlik həm böyük şərəf, həm də böyük məsuliyyətdir.

“Əsas məqsədim aydındır: insanlar, silah və sistem. Əsas diqqət Ukrayna əsgərinə yönəldilir. Tam təminat, vaxtında ödənişlər, etibarlı avadanlıq, tibbi xidmət. Əsas missiyalardan biri növbəti altı ay ərzində cəbhədə Ukrayna istehsalı olan silahların payını 40%-dən 50%-ə çatdırmaqdır. Nazirliyi sürətli, şəffaf, bürokratiyasız sistemə çevirəcəyik. Eyni zamanda, biz bütün dünyada müdafiə sahəsində tərəfdaşlığı gücləndirəcəyik. Məqsədimiz sülhü təmin etmək və gələcəkdə təcavüzün mümkünsüz olmasını təmin edəcək qədər güclü qüvvə yaratmaqdır. Ukrayna bütün çağırışlara tab gətirəcək və qalib gələcək. Ukraynaya şöhrət!” – Şmiqal bildirib.