Ukraynalı məktəblilər və tələbələr, cinsindən asılı olmayaraq, bundan sonra “milli müqavimətin əsasları” kursunu öyrənəcəklər və bu çərçivədə odlu silahdan istifadəni də mənimsəyəcəklər. Bu barədə Ukrayna Ali Radasının açıqlamasında bildirilib.

Volodimir Zelenski vətəndaşların milli müqavimətə hazırlanmasının bəzi məsələləri haqqında qanunu imzalayıb.

Sənəd orta məktəbdən ali təhsilə qədər bütün səviyyələrdə tədris prosesinə inteqrasiya olunan yeni təhsil modelini nəzərdə tutur. Dəyişikliklər “milli müqavimətin əsasları” fənninin tətbiqini, xüsusi tədris mərkəzlərinin yaradılmasını və praktiki məşğələlər üçün odlu silahdan istifadənin tənzimlənməsini əhatə edir. Müvafiq qanun No13347 parlament tərəfindən 25 mart 2026-cı ildə qəbul edilib.

Ukraynalı şagird və tələbələr peşəkar təlimatçıların rəhbərliyi ilə milli müdafiə bacarıqlarını öyrənəcəklər. Odlu silahla bağlı təlimlər Ukrayna Silahlı Qüvvələrinin təlim poliqonlarında, sertifikatlaşdırılmış atış meydançalarında və müasir interaktiv simulyatorlarda keçiriləcək.

Dini baxışlarına görə silahdan istifadə edə bilməyən şəxslər kursun “silahlı” modulları əvəzinə alternativ tədris komponentlərini seçə biləcəklər. Əlilliyi olan şəxslər və ya əmək qabiliyyətini itirmiş insanlar isə praktiki məşğələlərdən azad ediləcəklər.