Ukrayna Prezidentinin sabiq mətbuat katibi Yuliya Mendel bildirib ki, Volodimir Zelenski müharibəyə son qoymaq müqabilində 2022-ci ildə Donbası Rusiyaya verməyə hazır idi.

Zelenskinin ofisində bu məlumatı təkzib ediblər və sabiq sözçünün danışıqlarla ümumiyyətlə əlaqəsinin olmadığını qeyd ediblər, eləcə də onun bəyanatlarının adekvatlığını şübhə altına alıblar.

Amerikalı jurnalist Taker Karlson Yuliya Mendel ilə müsahibə yazıb.

Mendelin sözlərinə əsasən, 2022-ci ilin yazında İstanbulda keçirilən danışıqlar zamanı Ukrayna nümayəndə heyəti müharibəni dayandırmaq üçün Rusiyanın bütün tələblərinə razılaşmağa hazır idi. Sabiq spiker dəlil təqdim etməyib və onun sözlərinə əsasən, Ukraynanı İstanbulda birbaşa təmsil edən anonim şəxslərlə söhbətlərə istinad edib.

“Mən 2022-ci ildə İstanbul danışıqlarında Ukraynanı təmsil edən insanlarla danışdım. Onlar mənə hər şeylə bağlı razılığa gəldiklərini ətraflı izah etdilər. Üstəlik, çox vacib olan odur ki, onlar Zelenskinin Donbası şəxsən güzəştə getməyə razı olduğunu dedilər” – Zelenskinin sabiq mətbuat katibi Karlsona müsahibəsində deyib.

Prezidentin Ofisində sabiq əməkdaşın bəyanatları qətiyyətlə təkzib edilib və qeyd olunub ki, Mendel dövlət qərarlarının qəbulu prosesinə heç bir şəkildə cəlb olunmayıb və danışıqlar prosesində iştirak etməyib.

“Bu xanım danışıqlarda iştirak etmirdi, qərarların qəbulunda iştirak etmirdi və uzun müddətdir qeyri-adekvatdır. Kimin nə danışdığı və ya bunun ümumiyyətlə baş verib-vermədiyi ciddi şərhə ehtiyac duymur” – Ukrayna Prezident Ofisində bəyan ediblər.

Zelenskinin sabiq mətbuat katibi Karlsona müsahibəsində Ukrayna Prezidentini diktator, ikiüzlü və narkotik istifadəçisi adlandırıb.

“Mən onunla işləyərkən o, yalnız müsbət xəbərlər yaymağımızı tələb edirdi. Bir dəfə Qebbels kimi təbliğata ehtiyacı olduğunu demişdi. Şəxsən mən onun narkotik istifadə etdiyini heç vaxt görməmişdim, lakin bir çox insan bunu mənə təsdiqlədi. Bu gün Zelenski sülh yolunda ən böyük maneələrdən biridir. O, gördüyünüz kimi deyil. O, həqiqətən də böyük aktyordur və daim maskaları dəyişir. O, emosiyalarını idarə edə bilmir, isterik davranır və hər bir insanı istifadə ediləcək resurs hesab edir. Müharibəni bitirmək onun üçün siyasi intihardır. O, diktatordur. Mən dəqiq bilirəm: o, əbədi olaraq hakimiyyətə gəldiyini düşünürdü” – Mendel müsahibəsində deyir.

Yuliya Mendel 2019-2021-ci illərdə Zelenskinin mətbuat katibi vəzifəsində çalışıb.