Tvalcrelidze küçəsi N1 ünvanında bir az bundan əvvəl Milli İcra Bürosu köçürülmə prosesinə başladı və bu, orada yaşayan sakinlərlə hüquq-mühafizə orqanlarının əməkdaşları arasında bir neçə dəfə mübahisə ilə nəticələndi.

Vətəndaşlar evlərinə daxil olmağı tələb edirdilər, lakin onlara bunu etmək imkanı verilməyib.

Ərazidə vətəndaşlarla hüquq-mühafizə orqanlarının əməkdaşları arasında qarşıdurma baş verib. Gürcüstan Daxili İşlər Nazirliyinin məlumatına əsasən, qarşıdurma zamanı 4 nəfəri İnzibati Xətalar Məcəlləsinin 173-cü maddəsi ilə saxlayıblar, bu da hüquq-mühafizə orqanlarının əməkdaşlarının qanuni tələbinə tabe olmamağı nəzərdə tutur.

Milli İcra Bürosu Tvalcrelidze küçəsi N1 ünvanında davam edən icra prosesi haqqında məlumat yayıb. Məlumatda qeyd edildiyi kimi, bina-tikililər tamamilə köhnəlib və orada yaşayan insanların sağlamlığı və həyatı üçün təhlükəlidir. İcra Bürosunun məlumatına əsasən, bunu Samxarauli Ekspertiza Bürosunun rəyi də təsdiqləyir, rəydə açıq şəkildə qeyd olunub ki, binaların daşıyıcı divarları zədələnib və onların istənilən an uçma təhlükəsi var.

Bununla yanaşı, İcra Bürosu “qanunsuz şəkildə binalara daxil olmuş şəxslərə çağırış edir, məhkəmənin qərarını yerinə yetirsinlər, təklifləri qəbul etsinlər, əks halda, Büro qərarı icra etməyə borcludur”.