ABŞ Senatının çoxluq lideri Con Tuni ABŞ Nümayəndələr Palatasının spikeri Mayk Consonun Gürcüstan hökumətinin üzvlərinə qarşı sanksiyalar tətbiqini əhatə edən qanunu irəli çəkmək xahişini rədd edib – bu haqda məlumatı “The Hill” nəşri yayır.

Məqalədə deyildiyi kimi, konqresdəki iki mənbəyə əsasən, Mayk Conson “MEGOBARI Act” adı ilə tanınan qanunun həm Nümayəndələr Palatasında, həm də Senatda geniş dəstək alan ABŞ-nin “Milli Müdafiə Avtorizasiya Aktı”na əlavə edilməsini istəyib.

Nəşr yazır ki, son üç ayda Senatda çoxluq lideri Con Tuni oxşar tələbi artıq ikinci dəfə rədd edib.

“The Hill”in mənbələrinin məlumatına əsasən, Nümayəndələr Palatasının spikeri Mayk Consonun “Milli Müdafiə Avtorizasiya Aktı”na “MEGOBARI Act”ın əlavə edilməsi tələbi onlar üçün də gözlənilməz olub.

“Tuni sentyabrda onu rədd etdikdən sonra qanunun artıq ölü olduğunu zənn edirdik. Son dəqiqələrdə qanunu “Milli Müdafiə Avtorizasiya Aktı”na əlavə etməyə çalışdıq, bunu da spiker Conson tələb edirdi, lakin Tuninin müqavimətini dəf edə bilmədik” – Consonun köməkçiləri nəşrə söhbət zamanı deyiblər.

Məqalədə həmçinin qeyd olunub ki, Tuni bundan əvvəl də ABŞ-nin “Milli Müdafiə Avtorizasiya Aktı”na “MEGOBARI Act”ın əlavə edilməsini əngəlləyib, bunu senator Markuein Malin tələb edirdi.

Məqalədə qeyd olunub ki, “2020-ci ildə Malin “Gürcü Arzusu”nu Amerikanın düşmən rəqibləri və düşmənləri ilə yaxınlaşmaqda günahlandırmışdı. Lakin, 2025-ci ilin sentyabrında o, “The Hill” nəşrinə deyib ki, Gürcüstanın Baş naziri İrakli Kobaxidze ilə yaxşı münasibətləri var və Tbilisi ilə münasibətlərdə sanksiya qamçısı əvəzinə yumşaq yanaşmadan istifadəni üstün tutur”.

“Sanksiyalar tətbiq etməzdən əvvəl onlarla işləmək imkanına sahib olmaq istəyirəm. Onlarla işləmək istəyirəm ki, necə real suverenliyə sahib ola biləcəklərini, Rusiyanın təsirindən azad ola biləcəklərini görüm” – senator Malin sentyabrda nəşrə müsahibəsində bildirib.