Telavidə “Şərqi Avropa Çoxpartiyalı Demokratiya Mərkəzi” (EECMD) qeyri-hökumət təşkilatının təşkilatçılığı ilə “Demokratiya Festivalı” keçirilir.

Festivalda müxalifət liderləri, o cümlədən “Milli Hərəkat”ın sədri Tina Bokuçava, “Birlik” partiyasının lideri Giorgi Vaşadze, “Güclü Gürcüstan” koalisiyasının liderləri Mamuka Xazaradze və Badri Caparidze iştirak edirlər.

“Milli Hərəkat”ın sədri Tina Bokuçavanın dediyi kimi, “Demokratiya festivalı”nın mahiyyəti vətəndaşlara siyasi partiyaların seçkiqabağı proqramları ilə tanış olmaq imkanı verməkdir.

“Bu cür tədbirlərdə çoxpartiyalı formatda iştirak etmək çox vacibdir ki, vətəndaşlar siyasi partiyaların demokratiyanın möhkəmləndirilməsi kimi mühüm məsələdə əməkdaşlıq edə və birgə fəaliyyət göstərə bildiyini görsünlər. Bu gün cəmiyyətdə və təbii olaraq bizdən – siyasətçilərdən, siyasi partiyalardan bu ictimai qaydaya cavab vermək gözləntisi də budur”. – Bokuçava dedi.

“Güclü Gürcüstan” koalisiyasının liderlərindən biri Badri Caparidzenin sözlərinə görə, vətəndaşlara seçki proqramı barədə məlumat veriləcək.

“Biz hakimiyyətə gələn kimi həmvətənlərimizə nə edəcəyimizi demək istəyirik. Bu, 1000 lari pensiya, 200 min iş yeri, meqalayihələrin başa çatdırılması, ölkəmizin Aİ-yə inteqrasiyası və emiqrantların vətənlərinə qayıtmasıdır. Bu barədə həmvətənlərimizlə danışacağıq”, – deyə Badri Caparidze bildirib.

Məlumat üçün bildirək ki, bir həftə əvvəl, iyulun 27-də müxalifət nümayəndələrinin də iştirak etdiyi “Demokratiya festivalı” Tsalenjixada da keçirilib.