Tea Axvlediani prezident və baş nazirlə birlikdə Rusiya-Gürcüstan müharibəsi zamanı Şindisidə həlak olmuş gürcü hərbçilərin xatirəsini ehtiramla yad edib

Dövlət naziri Tea Axvlediani, prezident Mixeil Ğavelaşvili, baş nazir İrakli Kobaxidze və hökumətin üzvləri ilə birlikdə 2008-ci ilin Rusiya-Gürcüstan müharibəsi zamanı Şindisidə həlak olmuş gürcü hərbçilərin xatirəsini ehtiramla yad edib. Məlumatı Dövlət Nazirinin Aparatı yayır.

Barışıq və vətəndaş bərabərliyi məsələləri üzrə dövlət naziri memorialın önünə toplaşan həlak olmuş hərbçilərin ailə üzvlərinə başsağlığı verib və dəstəyini ifadə edib.

Gürcüstan hakimiyyətinin nümayəndələri Şindisidə qəhrəmancasına həlak olmuş 17 döyüşçünün ruhunun yad edilməsi üçün Qori və Ateni mitropoliti möhtərəm Andrianın din xadimləri ilə birlikdə keçirdiyi anım mərasimində iştirak ediblər.

“Məhz bu yerlər, Şindisi torpağı Rusiya-Gürcüstan müharibəsinin ən faciəvi və qeyri-bərabər döyüşlərindən birinin tarixini yaşadır, burada 17 gənc qəhrəman öz canları bahasına Gürcüstanın birliyini və ləyaqətini qorumağın müstəsna və əbədi nümunəsini göstərdi. Məhz bu fədakarlıq bizi sülhü qorumağa və möhkəmləndirməyə, Gürcüstanın bütün milli məqsədlərini reallaşdırmağa, barışıq yolu ilə xalqımızı birləşdirməyə və sülh yolu ilə ölkəmizin bütövlüyünü bərpa etməyə vadar edir. Əlbəttə ki, vahid, güclü və azad Gürcüstan Vətənə və öz dəyərlərinə sədaqətini canı bahasına sübut etmiş qəhrəmanlarımızın xatirəsinə ən böyük ehtiram olacaq. Ailələrə başsağlığı vermək və onlara hörmətimi ifadə etmək istəyirəm” – Tea Axvlediani bildirib.