Tbilisinin Meriyasının məlumatına əsasən, gürcü gənclərə Avropa miqyasında 25 000 endirimin qapısını açan proqram Gürcüstanda rəsmi olaraq fəaliyyətə başladı.

Onların məlumatına əsasən, “Avropa Gənclik Kartı” Avropa Şurasının dəstəyi ilə həyata keçirilən və artıq 40 ildir Avropa qitəsində 9.3 milyon gənc üçün səyahət imkanları yaradan Avropa təşəbbüsüdür.

Tbilisinin meri Kaxa Kaladze kartın fəaliyyətə başlaması ilə əlaqədar keçirilən tədbirin iştirakçılarına müraciət edib və qeyd edib ki, kart milyonlarla gənc üçün səyahət, əyləncə, mədəniyyət, idman və digər sahələrdə bir sıra imkanlar yaradır.

“Biz keçən il sözügedən təşəbbüs barədə ictimaiyyətə artıq məlumat vermişdik, indi isə vədimizin birbaşa icrasına keçirik – gürcü gənclər bundan sonra “Avropa Gənclik Kartları”ndan yararlanacaqlar, çünki biz istəyirik ki, gürcü gənclərində heç vaxt öz imkanlarına çıxışın məhdud olması təəssüratı yaranmasın. Kart Gürcüstanın 18-30 yaş arası gəncləri üçün Avropa miqyasında 25 000 endirimin qapısını açır və milyonlarla gənc üçün səyahət, əyləncə, mədəniyyət, idman və digər sahələrdə bir sıra imkanlar yaradır. Unutmayın, bu kart sadəcə endirimlərdən ibarət deyil – bu, yeni təcrübə, yeni imkanlar və Avropa məkanı ilə daha sıx əlaqə deməkdir” – Tbilisinin meri bildirib.

O deyib ki, Tbilisinin Meriyası öz imkanları daxilində gənclər üçün təşviq və dəstək tədbirləri həyata keçirir.

“İdman, mədəniyyət və təhsil istiqamətlərində çox sayda gəncin cəlb olunduğu proqramlarımız var. Hər il bütün proqramları genişləndirməyə və daha çox vətəndaşa onlarda iştirak etmək imkanı verməyə çalışırıq, çünki təhsilli və uğurlu gənc ölkənin quruculuğunun təməl daşıdır. Şadam ki, Tbilisinin Meriyası bu dəfə də ön sıralardadır və gənclərimizin Avropa gənclərinin sıralarına qoşulmasını təmin edəcək bu ən mühüm proqramı həyata keçirmək imkanı verilib. Həm özəl şirkətlər, həm də bələdiyyənin idman və mədəniyyət mərkəzləri onlara xüsusi şərtlər təklif edirlər” – Kaxa Kaladze qeyd edib.

Paytaxtın meri Gürcüstan Bankının nümayəndələrinə təşəkkür edib, çünki onlarla imzalanmış memorandum əsasında “Gənclik Kartı” Gürcüstan Bankının mobil tətbiqində artıq əlçatandır.

“Mərkəzi hakimiyyətə, baş nazir İrakli Kobaxidzeyə nümayiş etdirdiyi dəstək və həmrəyliyə görə təşəkkür etmək istəyirəm. Onların iştirakı olmasaydı, bələdiyyə bu cür irimiqyaslı layihələri həyata keçirə bilməzdi. Müavinim Andria Basilaiaya, eləcə də Tbilisinin Meriyasının Təhsil, Mədəniyyət, İdman və Gənclər İşləri üzrə Şəhər Xidmətinin rəhbəri İrakli Qvilavaya və bu mühüm təşəbbüsün reallığa çevrilməsində aktiv rol oynamış qurumun bütün əməkdaşlarına təşəkkür düşür.

Biz hər zaman sizin yanınızda olacaq, hər zaman sizi dinləyəcək və gənclərə dəstək olan ideyaları həyata keçirməyə çalışacağıq ki, öz sözümüzü təkcə Gürcüstanda deyil, dünyanın müxtəlif ölkələrində də deyək. Sizdən çox şey asılıdır, gənclik enerjisindən çox şey asılıdır. Əminəm ki, hər birinizin vətənimizə bəslədiyi sevgi ən mühüm və ən əsasdır” – paytaxtın meri qeyd edib.

Tbilisinin Meriyasının Təhsil, Mədəniyyət, İdman və Gənclər İşləri üzrə Şəhər Xidmətinin rəhbəri tərəfindən “Avropa Gənclik Kartı” haqqında əlavə detallar ictimaiyyətə təqdim edilib.

Onun sözlərinə əsasən, qeyd olunan kartın sahibləri Avropanın 40 ölkəsində xüsusi təkliflərdən yararlana biləcəklər. Həmçinin yerli səviyyədə artıq 50-dən çox təklif əlçatandır, bu da ölkə miqyasında 600-dən çox obyekti əhatə edir.

“Gürcüstan Bankının mobil tətbiqində sözügedən kartın qeydiyyat prosesi olduqca sadədir, birdəfəlik 10 lari ödəməklə isə ondan bütün il boyu istifadə etmək mümkün olacaq. Məhsulu bir neçə illik işdən sonra təqdim etdik. Bu, pul köçürmələrini həyata keçirməyin mümkün olduğu tipik kart deyil, lakin Gürcüstan Bankı ilə birlikdə çox mühüm funksiyanı yerinə yetirir. Kart sahibi olacaq gənclərə uğurlar arzulamaq istəyirəm. Düşünürəm ki, bir ildən sonra mühüm yekun tədbir keçirəcəyik” – İrakli Qvilava bildirib.

Həm özəl şirkətlər, həm də bələdiyyənin idman və mədəniyyət mərkəzləri “Avropa Gənclik Kartı” sahiblərinə xüsusi şərtlər təklif edir. Gürcüstanın Mədəniyyət Nazirliyi də proqramın tərəfdaşıdır və onun dəstəyi ilə 19 dövlət muzeyində və altı teatrda xüsusi tariflər qüvvədədir.

Kart sahibləri müxtəlif xidmətlərdə 5%-dən 40%-ə qədər güzəştdən yararlanırlar. “Avropa Gənclik Kartı”nı Gürcüstanın 18-dən 30 yaşadək olan vətəndaşları əldə edə bilərlər. Proqram haqqında ətraflı məlumatı, həmçinin yerli və ya beynəlxalq təklifləri görmək üçün rəsmi internet səhifəsi əlçatandır.

Tbilisinin merinin müavinləri, parlament və şəhər şurasının üzvləri, rayon icra hakimiyyətləri və Gürcüstan Bankının nümayəndələri, eləcə də gənclər tədbirdə iştirak edirdilər.

Tbilisinin Meriyasının məlumatına əsasən, proqram Avropa Gənclik Kartı Assosiasiyasının (EYCA) lisenziyalı üzvü olan Tbilisinin Meriyası tərəfindən həyata keçirilir.