Tbilisidə Böyük Diğomi yaşayış massivini “Didube” metro stansiyası ilə birləşdirəcək tramvay xəttinin tikintisinə başlanılır

Tbilisidə tramvay xəttinin tikintisinə başlanılır. Bu barədə Tbilisi meri Kaxa Kaladze tramvay xəttinin layihələndirilməsi və tikintisi ilə bağlı müqavilənin imzalanması mərasimində bildirib.

Kaladzenin sözlərinə görə, tramvay xətti Böyük Diğomi yaşayış massivini “Didube” metro stansiyası ilə birləşdirəcək.

Onun sözlərinə görə, layihənin növbəti dörd il ərzində başa çatdırılması planlaşdırılır.

“Bu gün paytaxtımız üçün həqiqətən də əlamətdar gündür. Çünki Tbilisinin Nəqliyyat Şirkəti ilə Türkiyənin “İvay” birgə müəssisəsi arasında Tbilisidə tramvay xəttinin layihələndirilməsi və tikintisi ilə bağlı müqavilə imzalanır.

Xatırlayıram, tramvayın geri qaytarılması ilə bağlı ilk dəfə açıqlama verəndə cəmiyyətdə buna böyük maraq yaranmışdı. Böyük sevinc var idi, eyni zamanda tamamilə təbii bir sual da səslənirdi: bu ideya nə vaxt reallığa çevriləcək? Bu gün məhz həmin suala cavab veririk. İdeyadan və vəddən konkret işə keçirik.

Bu, mənim və komandam üçün xüsusilə vacibdir. Çünki böyük infrastruktur layihələri yalnız bir açıqlama ilə həyata keçirilmir. Bunun üçün planlaşdırma, maliyyə resursları, peşəkarların iştirakı, vaxt və ən əsası, başlanılan işi sona çatdırmaq üçün siyasi iradə lazımdır.

Bu səbəbdən ilk növbədə siyasi komandamıza – “Gürcü Arzusu”na, həmçinin dəstəyinə görə Baş nazir İrakli Kobaxidzeyə təşəkkür etmək istəyirəm.

Tramvayın Tbilisiyə qaytarılmasının simvolik əhəmiyyəti var. Bu, yaşlı nəslin gündəlik həyatının bir hissəsi olmuş şəhər mədəniyyətinin geri qaytarılmasıdır. Lakin biz keçmişə qayıtmaq niyyətində deyilik. Tramvayı Tbilisi üçün gələcəyin nəqliyyat sistemini yaratmaq məqsədilə geri qaytarırıq.

2017-ci ildən həyata keçirməyə başladığımız nəqliyyat siyasətimiz də məhz buna xidmət edir – şəhərdə hərəkət daha sürətli, rahat, təhlükəsiz və hər kəs üçün əlçatan olsun. Küçə piyadaya, ictimai nəqliyyat sərnişininə, ekoloji nəqliyyatdan istifadə edənlərə və avtomobil sürücülərinə bərabər şəkildə xidmət etməlidir.

Biz istəyirik ki, insanlar ictimai nəqliyyatı başqa seçimləri olmadığı üçün deyil, onun sürətli, rahat və etibarlı olduğuna görə seçsinlər. Tramvay da bu sistemin daha bir mühüm hissəsinə çevriləcək.

Tramvay xətti Böyük Diğomi yaşayış massivini “Didube” metro stansiyası ilə birləşdirəcək. Layihə üç mərhələdən ibarətdir: konseptual layihənin hazırlanması, detallı layihələndirmə və tikinti işləri. Üç mərhələnin ümumi müddəti 36 aydır. Bütün əlaqədar prosedurlar nəzərə alınmaqla, layihənin növbəti dörd il ərzində başa çatdırılması planlaşdırılır”, – deyə Kaxa Kaladze bildirib.

Kaladzenin sözlərinə görə, belə böyükmiqyaslı layihə müəyyən narahatlıqların yaranmasını qaçılmaz edir. Onun sözlərinə görə, narahatlığın minimuma endirilməsi üçün bütün tədbirlər görüləcək.

“Əlbəttə, Tbilisinin bütün nəqliyyat problemlərini bir tramvay xətti həll edə bilməz və mən bunu iddia etmək fikrində də deyiləm. Lakin böyük dəyişikliklər həmişə ilk addımdan başlayır.

İstəyirik ki, bu xətt müasir tramvay şəbəkəsinin inkişafının başlanğıcı və Tbilisinin nəqliyyat sisteminin yeni mərhələsi olsun.

Qarşıda bizi çətin iş prosesi gözləyir. Belə böyükmiqyaslı layihə müəyyən narahatlıqlarla müşayiət olunur. Buna görə də elə bu gündən Tbilisi sakinlərinə bildirmək istəyirəm ki, həm mən, həm də komandam bütün mərhələlərdə mümkün qədər açıq olacağıq, işlər barədə əvvəlcədən məlumat verəcəyik və narahatlığı maksimum dərəcədə azaltmaq üçün əlimizdən gələni edəcəyik.

Şəhər gələcəyini qurarkən bəzən müvəqqəti narahatlıqlara da dözməli oluruq. Əsas məsələ isə bu proses başa çatdıqdan sonra şəhərdə nələrin qalacağıdır.

Bu gün biz sadəcə müqavilə imzalamırıq. Bu gün Tbilisinin nəqliyyat tarixində yeni səhifə açmalı olan layihəyə başlayırıq.

Türkiyə şirkətinə, Nəqliyyat Şirkətimizə və bu böyükmiqyaslı layihənin həyata keçirilməsində iştirak edəcək, prosesə cəlb olunacaq bütün insanlara uğurlar arzulayıram.

Biz Tbilisi sakinlərinə tramvayı geri qaytaracağımıza söz vermişdik. Bu gün həmin vədin icrasının konkret mərhələsinə başlayırıq.

Növbəti əsas gün isə ilk tramvayın bu xətt üzrə sərnişinlərlə hərəkət edəcəyi gün olacaq.

Şəhərimiz üçün xeyirli iş görən hər kəsə uğurlar arzulayıram”, – deyə Kaxa Kaladze bildirib.