Tbilisi Meriyası Ağmaşenebeli prospektinin bir hissəsinin bərpasını planlaşdırır

Tbilisi Meriyası Ağmaşenebeli prospektinin bir hissəsinin – Tamar Mepe prospektindən Marcanişvili meydanı da daxil olmaqla mövcud yol hissəsinin bərpasını planlaşdırır.

Tbilisinin meri Kaxa Kaladzenin bu gün paytaxt hökumətinin iclasında dediyi kimi, bərpa işlərinin satın alınması məqsədilə tender elan edilib və tender cari ilin sentyabrın 3-də başa çatacaq.

“Biz paytaxtın müxtəlif rayon və məhəllələrində infrastruktur layihələrinin həyata keçirilməsini fəal şəkildə davam etdiririk. Məqsədimiz şəhərdə gündəlik vətəndaşlarımızın maraqlarına xidmət edəcək və ən əsası, onilliklərə tab gətirəcək nizamlı, təhlükəsiz və müasir mühit yaratmaqdır. Bu dəfə Ağmaşenebeli prospektinin mühüm hissəsinin – Tamar Mepe prospektindən Marcanişvili meydanı da daxil olmaqla olan ərazinin bərpasını planlaşdırırıq. Layihə çərçivəsində yağış suları şəbəkəsi nizamlanacaq, səki və avtomobil yolu bərpa olunacaq, mövcud zədələnmiş daş döşəmə yeni asfalt örtüyü ilə əvəzlənəcək. Velosiped yolu salınacaq. Həmçinin, küçə işıqlandırılması şəbəkəsi yenilənəcək və LED lampalar quraşdırılacaq. Meydanda yaşıllıq adaları yenilənəcək və infrastruktur məhdud imkanlı şəxslər üçün uyğunlaşdırılacaq” – Kaxa Kaladze bildirib.

Paytaxtın meri maraqlanan və ixtisaslı bütün şirkətləri bərpa işlərinin satın alınması məqsədilə elan olunmuş tenderdə fəal iştirak etməyə çağırıb.