Tayvan Prezidenti müdafiə qabiliyyətini artırmağa hazır olduğunu bildirir – “Müdafiəyə sərmayə qoymaq sülhə sərmayə qoymaq deməkdir”

Tayvan Prezidenti Lay Tsinde bildirib ki, Tayvan müdafiə qabiliyyətini artırmağa hazırdır, çünki müdafiəyə sərmayə qoymaq sülhə sərmayə qoymaq deməkdir.

O, gələn il üçün müdafiə xərclərinin 16% artırılaraq 31.4 milyard ABŞ dollarını keçəcəyini təsdiqləyib. Tayvan Prezidentinin bəyanatına əsasən, bu göstərici ölkənin ümumi daxili məhsulunun (ÜDM) 3%-dən çoxunu təşkil edir.

Lay Tsinde bildirib ki, “Bu, Tayvanın öz müdafiə imkanlarını gücləndirmək yolundakı qətiyyətini göstərir”.

“Müdafiəyə sərmayə qoymaq sülhə sərmayə qoymaqdır. Tayvan boğazında və regionda sülh və sabitliyi qoruyub saxlamaq üçün daha güclü müdafiə qüvvəsi yaratmağa davam edirik” – Tayvan Prezidenti qeyd edir.

Tayvan hökuməti gələn ilin büdcə layihəsini rəsmi olaraq avqustun 20-də təqdim edəcək. Məhz o zaman müdafiə üçün ayrılan vəsaitlərin konkret hansı istiqamətlərə xərclənəcəyi məlum olacaq.

“Reuters”in yazdığı kimi, Çin tərəfindən artan təhlükə səbəbindən hərbi modernləşdirmə Tayvan hökuməti üçün əsas siyasi prioritetə çevrilib. Çin ordusu demək olar ki, hər gün Tayvan ətrafında manevrlər həyata keçirir və dövri olaraq hərbi təlimlər də keçirir. Sonuncu dəfə analoji təlimlər dekabr ayında keçirilib.