Tamar İoseliani – Anakliya limanının səmərəli inkişafı onun tam potensialından istifadənin müəyyənləşdirilməsini təmin edən düzgün hazırlanmış baş plandan asılıdır.
Anakliya dərin dəniz limanının inkişafı və uğuru onun tam potensialından istifadəyə imkan verəcək düzgün hazırlanmış baş plandan asılıdır. Bu barədə Niderland Krallığında işgüzar səfərdə olan iqtisadiyyat və davamlı inkişaf nazirinin müavini Tamar İoseliani bildirib.
Onun sözlərinə görə, baş planın yenilənməsi ilə bağlı mühüm müzakirələr aparılıb. Məqsəd Anakliya limanı ərazisindən səmərəli istifadə etmək və onu bazarın tələblərinə uyğunlaşdırmaqdır.
Nazir müavini beynəlxalq konsaltinq şirkəti Port Consultants Rotterdam ilə görüş keçirib. Görüş zamanı tərəflər Anakliya dərin dəniz limanının inkişafı üzrə baş planın alternativ variantlarını, növbəti addımların müəyyənləşdirilməsini, mümkün məlumat çatışmazlıqlarının aşkarlanmasını və əsas risklərin qiymətləndirilməsini müzakirə ediblər.
“Bu gün həm Anakliya dərin dəniz limanının baş planının yenilənməsi üzərində çalışan məsləhətçimizlə, həm də hazırda limanda tikinti işlərinin aparıldığı detallı layihəni hazırlayan şirkətlə görüş keçirdik. Məqsəd müvafiq dalğaqıranın inşası və dərinliyin 18 metrə qədər artırılmasıdır.
Mövcud baş planın necə yenilənməsi ilə bağlı mühüm müzakirələr apardıq ki, Anakliya limanı üçün ayrılmış ərazidən səmərəli istifadə olunsun, ərazi tam mənimsənilsin və layihə bazarın tələblərinə uyğun, uğurlu şəkildə planlaşdırılsın.
Anakliya dərin dəniz limanının inkişafı və uğuru onun tam potensialının, nəqliyyat və logistika qovşağı kimi imkanlarının reallaşdırılmasını təmin edən düzgün hazırlanmış baş plandan asılıdır”, – deyə Tamar İoseliani bildirib.
Niderlandda həmçinin Dəniz Nəqliyyatı Agentliyinin direktoru İvane Abaşidze və Anakliya Dəniz Limanının direktoru Zurab Siçinava da işgüzar səfərdə olublar.
Məlumatı Gürcüstanın İqtisadiyyat və Davamlı İnkişaf Nazirliyi yayıb.