Şəhər dəmir yolu dəhlizinin texniki-iqtisadi əsaslandırılmasının öyrənilməsi üçün beynəlxalq tender elan edilib

Tbilisinin Meriyasının təşəbbüsü, “Gürcüstan Dəmir Yolları” ilə əməkdaşlıqla, şəhər dəmir yolu dəhlizinin texniki-iqtisadi əsaslandırılmasına dair araşdırma aparılması planlaşdırılır, bunun üçün də beynəlxalq tender elan olunub – bu barədə bu gün paytaxt hökumətinin iclasında Tbilisinin meri Kaxa Kaladze qeyd edib.

O, maraqların ifadə edilməsi üçün müddətin iyulun 13-nə qədər müəyyən edildiyini bildirib.

“Beynəlxalq tender Asiya İnkişaf Bankının satınalma qaydalarına uyğun olaraq elan edilib və maraqların ifadə edilməsi üçün müəyyən olunmuş müddət iyulun 13-də başa çatacaq. Layihənin konsepsiyası Tbilisinin davamlı şəhər mobilliyi planına əsaslanır. Bu plan mövcud dəmir yolu infrastrukturundan istifadə etməklə paytaxtın Mtsxeta, Rustavi, Tbilisi Beynəlxalq Hava Limanı və şərq rayonları ilə birləşdirilməsini nəzərdə tutur. Bu, əsasən mövcud dəmir yolu infrastrukturundan istifadəni nəzərdə tutur, lakin ehtiyac halında, yeni dəmir yolu hissələrinin və ya dolama xətlərin tikintisi də nəzərdən keçirilə bilər” – Tbilisinin meri bildirib.

Kaxa Kaladze bildirib ki, layihənin məqsədi həm ətraflı texniki-iqtisadi araşdırmanın aparılması, həm də ətraf mühit, sosial və maliyyə tərəflərinin qiymətləndirilməsidir.

“Layihənin məqsədi ixtisaslaşmış məsləhətçi şirkət tərəfindən Tbilisinin aqlomerasiyasında şəhər dəmir yolu dəhlizinin inkişafı üçün ən yaxşı alternativləri müəyyən edəcək ətraflı texniki-iqtisadi araşdırmanın aparılmasıdır. Həmçinin, ətraf mühit, sosial və maliyyə tərəfləri qiymətləndiriləcək. Müsabiqədə iştirak edən şirkətlər arasından ən yaxşı namizəd seçiləcək və müəyyən tender prosedurlarından sonra isə araşdırma işlərinə başlanılacaq.
Bundan sonra layihənin həyata keçirilməsi ilə bağlı tam mənzərəyə və bu istiqamətdə hansı addımların atılmasına dair ətraflı məlumata sahib olacağıq. Layihə paytaxtın nəqliyyat planının bir hissəsidir və Asiya İnkişaf Bankının maliyyə dəstəyi ilə həyata keçirilir” – Kaxa Kaladze qeyd edib.

O, bildirib ki, araşdırma prosesinə texniki nəzarəti və koordinasiyanı Tbilisinin Meriyasının Nəqliyyat və Şəhər İnkişafı Agentliyi həyata keçirəcək.