Sulxan Tamazaşvili Ermənistan Respublikasının Milli Təhlükəsizlik Xidmətinin direktoru ilə görüşüb

Ermənistan Respublikasına rəsmi səfəri çərçivəsində Gürcüstanın daxili işlər naziri Sulxan Tamazaşvili Ermənistan Respublikasının Milli Təhlükəsizlik Xidmətini ziyarət edib və qurumun direktoru Andranik Simonyan ilə görüşüb.

Görüşdə Gürcüstanın Daxili İşlər Nazirliyinin nümayəndə heyətinin üzvləri, o cümlədən nazirin birinci müavini Roni Mesxi və Patrul Polisi Departamentinin direktoru Levan Maisuradze iştirak ediblər. Tərəflər regionda gedən prosesləri və müasir təhlükəsizlik çağırışlarını müzakirə ediblər. İki ölkə arasında sərhəd sahəsində mövcud əməkdaşlıq və sərhədyanı cinayətkarlığa qarşı mübarizədə koordinasiya mexanizmlərinin daha da inkişaf etdirilməsi məsələlərinə xüsusi diqqət yetirilib.

Görüş çərçivəsində Gürcüstanın daxili işlər naziri iki qurum arasında sıx əməkdaşlığın əhəmiyyətini xüsusilə qeyd edib və qarşılıqlı maraq doğuran sahələrdə gələcək münasibətlərin daha da möhkəmləndirilməsi istiqamətində hazır olduqlarını ifadə edib.

Məlumatı Gürcüstanın Daxili İşlər Nazirliyinin mətbuat xidməti yayır.