İran əleyhinə hərbi əməliyyatın ilk 100 saatı ABŞ-a 3,72 milyard dollar başa gəlib – bu barədə məlumatı Strateji və Beynəlxalq Tədqiqatlar Mərkəzinin mütəxəssisləri yayıblar.

Onların hesablamalarına görə, “Epik Qəzəb” əməliyyatının ilk 100 saatında ABŞ gündə təxminən 891,4 milyon dollar xərcləyib.

Bu xərclərin əsas hissəsi İran üzərinə zərbələr endirmək üçün istifadə olunan döyüş materiallarına aiddir. İlk 100 saat ərzində ABŞ hərbi qüvvələri 3,1 milyard dollar dəyərində bomba və raketlərdən istifadə edib.

Ekspertlərin sözlərinə görə, əməliyyatın xərclərinin bir hissəsi, məsələn, texnikanın istismarı, əvvəlcədən hərbi büdcədə nəzərdə tutulmuşdu, lakin əsasən söhbət büdcə xarici xərclərdən gedir ki, bu da ABŞ Müdafiə Nazirliyindən əlavə maliyyə ayrılmasını və ya artıq nəzərdə tutulmuş xərclərin digər proqramlara yönəldilməsini tələb edir.