Slovakiya və Macarıstan Avropa İttifaqına üzv ölkələr alternativ təchizat mənbələri tapana qədər, Rusiyadan neft və qaz alışını azaltmağı düşünmürlər – bu barədə “Bloomberg” yazır.

Bratislavada jurnalistlərlə görüşü zamanı Slovakiyanın iqtisadiyyat naziri Denisa Sakova bildirib ki, ölkəsi tərəfindən rus neftinin idxalından imtina edilməsinə qədər bunun üçün “lazımi şərait” yaradılmalıdır.

“Tam şəkildə öhdəlik götürə bilməzdən əvvəl, uyğun şərait yaratmalıyıq – əks halda, biz sənayemizə və iqtisadiyyatımıza ciddi zərər vura bilərik” – Sakova bildirib.

Sakova, alternativ marşrutları dəstəkləmək üçün əvvəlcə kifayət qədər infrastruktur yaradılması gərəkdiyini qeyd edib. O bildirib ki, bu həftə Vyanada ABŞ-nin energetika katibi Kris Raytla danışıqlar zamanı Slovakiyanın mövqeyini açıq şəkildə ifadə edib. Sakovanın qeyd etdiyi kimi, Tramp administrasiyasının nümayəndəsi etiraf edib ki, ABŞ Avropada enerji layihələrini gücləndirməlidir.

Öz növbəsində, Macarıstanın Baş nazirinin administrasiyasının rəhbəri Qerqeli Qulias bildirib ki, Macarıstan Avropa İttifaqının onun enerji təhlükəsizliyini təhdid edən təşəbbüslərini rədd edir.