Sidneydə Bondi çimərliyində baş vermiş kütləvi atışmada şübhəli bilinən Navid Əkrəmə qarşı 59 ittiham irəli sürüblər. 15 nəfərin qətli və terror aktının törədilməsi onların arasındadır.

Medianın məlumatına əsasən, həmçinin Əkrəmə qarşı ittiham öldürmək niyyəti ilə şəxsə ağır bədən xəsarəti yetirməyə, eləcə də qadağan olunmuş terror təşkilatının simvolunu ictimai şəkildə sərgilədiyinə görə irəli sürüblər.

Hüquq-mühafizə orqanlarının əməkdaşları ikinci hücumçunu, Navid Əkrəmin atası Sacid Əkrəmi hadisə yerində atışma nəticəsində qətlə yetiriblər.

Onu polislə qarşılıqlı atışma zamanı hadisə yerində qətlə yetiriblər. Yeni Cənubi Uels polisi bunun 1996-cı ildən sonra ölkənin ən qanlı hücumu olduğunu bildirib.

Bununla yanaşı, “BBC”nin məlumatına əsasən, Navid Əkrəm polislə toqquşma zamanı ağır yaralanıb və hazırda xəstəxanadadır. Hücumda yaralanan iyirmi nəfər Sidneyin xəstəxanalarında qalır, onlardan birinin vəziyyəti ağırdır.

Məlumat üçün bildirək ki, Avstraliyada Bondi çimərliyində baş verən atışmada 15 nəfər həyatını itirib. Həlak olanlar arasında uşaq da var. Polisin məlumatına əsasən, hücumda iştirak edən şəxslərə məxsus avtomobildə “İslam Dövləti” qrupunun bayraqları və əldəqayırma partlayıcı qurğular tapıblar.