Çin Prezidenti Si Dzinpin Pekində Almaniyanın kansleri Fridrix Mertsə deyib ki, Berlin və Pekin strateji ünsiyyəti və qarşılıqlı etimadı gücləndirməlidir, çünki dünya getdikcə daha da narahat və mürəkkəb olur.

Si Dzinpin həmçinin iki ölkə arasındakı münasibətlərə böyük əhəmiyyət verdiyini bildirib.

“On il əvvəl bir neçə dəfə bəyanat verdim ki, dünya bir əsrdə baş verməyən mühüm transformasiya keçirir. Bu yaxınlarda bəyan etdiniz ki, biz epoxal dönüş nöqtəsi ilə qarşı-qarşıyayıq. Dünya nə qədər təlatümlü və bir-biri ilə əlaqəli olarsa, Çin və Almaniya bir o qədər strateji ünsiyyəti və strateji qarşılıqlı etimadı gücləndirməlidir” – Çinin lideri bildirib.

“Reuters”in yazdığı kimi, Çinə ilk səfərini edən Fridrix Merts Pekinlə əlaqələri dərinləşdirmək istəyən yeganə Qərb lideri deyil. Cari ilin əvvəlində Birləşmiş Krallıq və Kanadanın baş nazirləri də Pekinə səfər ediblər.