Sərhəd Polisi narkotik cinayətinə görə bir nəfəri saxlayıb

Daxili İşlər Nazirliyinin Sərhəd Polisinin əməkdaşları gömrük keçid məntəqəsinin əməkdaşları ilə birlikdə, Batumi İdarəsinin sərhəd sektoru “Sarpi”nin mühafizə olunan hissəsində xarici ölkə vətəndaşı 1980-ci il təvəllüdlü S.A.-nı saxlayıblar. Məlumatı Sərhəd Polisinin mətbuat xidməti yayır.

“Polis təqsirləndirilən S.A.-nı dövlət sərhədindən külli miqdarda narkotik vasitənin qanunazidd şəkildə gətirilməsi faktı ilə əlaqədar saxlayıb.

İstintaq Gürcüstan Cinayət Məcəlləsinin 260-cı maddəsinin üçüncü hissəsinin “a” yarımbəndi və 262-ci maddəsinin dördüncü hissəsinin “a” yarımbəndi ilə aparılır, bu isə cəza şəklində 20 ilə qədər və ya ömürlük azadlıqdan məhrum etməni nəzərdə tutur” – məlumatda qeyd olunub.