Sərhəd Polisi Gürcüstanın dövlət sərhədinin qanunsuz şəkildə keçilməsi faktı üzrə iki xarici ölkə vətəndaşını saxlayıb

Daxili İşlər Nazirliyinin Sərhəd Polisinin əməkdaşları Batumidə və “Sarpi” sərhəd sektorunun mühafizə olunan hissəsində həyata keçirilən əməliyyat tədbirləri və istintaq hərəkətləri nəticəsində, iki xarici ölkə vətəndaşını – 1985-ci il təvəllüdlü A.D.-ni və 2000-ci il təvəllüdlü C.K.-ni Gürcüstanın dövlət sərhədinin qanunsuz şəkildə keçilməsi faktı üzrə saxlayıblar. Bu barədə bəyanatı Sərhəd Polisi yayır.

Qurumun məlumatına əsasən, cinayət 5 ilə qədər azadlıqdan məhrum etməni nəzərdə tutur.

“İstintaq müəyyən edib ki, təqsirləndirilən A.D. sərhəd-nəzarət buraxılış məntəqəsindən yan keçərək Türkiyə Respublikasından Gürcüstan istiqamətində yük avtomobilində gizlənmək yolu ilə qanunsuz şəkildə Gürcüstanın dövlət sərhədini keçib, təqsirləndirilən C.K. sərhəd-nəzarət buraxılış məntəqəsindən yan keçərək Türkiyə Respublikasından Gürcüstanın dövlət sərhədini qanunsuz şəkildə keçib və Gürcüstana daxil olub.

İstintaq Gürcüstan Cinayət Məcəlləsinin 344-cü maddəsinin 1-ci hissəsi ilə aparılır, bu isə Gürcüstanın dövlət sərhədinin qanunsuz şəkildə keçilməsi deməkdir” – Sərhəd Polisinin bəyanatında deyilir.