Serqei Şoyqu – Ukrayna dronlarının inkişaf dinamikası və onlardan istifadə üsulları elədir ki, Rusiyanın heç bir bölgəsi artıq özünü təhlükəsiz hiss edə bilməz

Ukrayna dronlarının inkişaf dinamikası və onlardan istifadə üsulları elədir ki, Rusiyanın heç bir bölgəsi artıq özünü təhlükəsiz hiss edə bilməz – bu haqda Rusiya Təhlükəsizlik Şurasının katibi Serqei Şoyqu Yekaterinburqda keçirilən iclasda deyib.

“Bir müddət əvvəl Ural Ukrayna ərazisindən hava zərbələri üçün əlçatmaz idi, bu gün isə artıq birbaşa təhlükə zonasındadır” – Şoyqu bildirib.

Şoyqunun qeyd etdiyi kimi, Ural həmçinin geniş nəqliyyat infrastrukturu ilə seçilir, o cümlədən iri dəmir yolu magistralları və federal əhəmiyyətli avtomobil magistralları ilə.

“Onların sıradan çıxarılması təkcə əhəmiyyətli iqtisadi ziyana deyil, həm də böyük aqlomerasiyalarda həyatın qeyri-sabitliyinə də, təchizat zəncirlərinin, o cümlədən “xüsusi hərbi əməliyyat”ı təmin edən kritik əhəmiyyətli sistemlərin pozulmasına səbəb ola bilər” – Serqei Şoyqu bildirib.

Bununla yanaşa, noyabrın 27-də Yekaterinburqda və Sverdlovsk vilayətində ilk dəfə raket təhlükəsi rejimi elan edilib.

“Burada müdafiə-sənaye kompleksinin strateji müəssisələri, enerji və kimya sənayesi obyektləri, eləcə də ən böyük neft və qaz yataqları cəmləşib” – “İnterfaks” Şoyqunun sözlərindən sitat gətirir.

Həmçinin, Şoyqu qeyd edib ki, 2025-ci ildə Ukrayna tərəfindən Rusiyanın bölgələrindəki infrastruktur obyektlərinə edilən hava hücumlarının sayı demək olar ki, dörd dəfə artıb. Şoyqu bu cür hücumların sayının 23 minə çatdığını deyib.