Rusiyanın xarici işlər naziri Serqei Lavrov 2025-ci ilin yekun mətbuat konfransında bir neçə məsələyə diqqət yönəldib.

Serqei Lavrov Rusiya ilə dialoqun zərurətindən danışan avropalı liderləri tənqid edib. Onun sözlərinə əsasən, belə bəyanatlar “qeyri-ciddi səslənir”.

“Əgər avropalı liderlərin Rusiya ilə təmas qurmaqda ciddi niyyəti varsa, sadəcə zəng etməlidirlər” – Lavrov bildirib.

Bununla yanaşı, Rusiyanın xarici işlər naziri ABŞ dövlət katibi Marko Rubio ilə Ər-Riyadda keçirilən görüşdən danışıb.

Serqei Lavrovun bəyanatına əsasən, Rubio Amerika siyasətinin fəlsəfəsini belə ifadə edib: “Trampın prezidentliyi dövründə ABŞ-nin xarici siyasətini milli maraqlar və sağlam düşüncə müəyyən edəcək”. Lavrovun izah etdiyi kimi, o, bu fəlsəfəni tam bölüşür.

Rusiyanın xarici işlər naziri Rusiya tərəfindən Qrenlandiyanın “fəth edilməsi” haqda planları da təkzib edib.

“Qrenlandiyanı fəth etmək planları ilə heç bir əlaqəmiz yoxdur. Şübhəm yoxdur ki, Vaşinqtonda çox yaxşı bilirlər ki, nə Rusiya, nə də Çinin belə planları var. Bu, bizim məsələ deyil” – Serqei Lavrov bildirib.