Senator Lindsi Qraham bəyan edir ki, Senat Rusiyaya qarşı əlavə sanksiyalar tətbiq etməyə hazırdır

Amerikalı respublikaçı senator Lindsi Qraham bildirib ki, ABŞ Senatı Rusiyaya qarşı əlavə sanksiyaların tətbiqinə hazırdır. Senator dünən Donald Trampın Rusiyaya qarşı bank və ya ikinci dərəcəli sanksiyaların tətbiqi ehtimalı barədə verdiyi açıqlamaya münasibət bildirib.

Lindsi Qraham sosial şəbəkə X-də yazdığına görə, Senatda hazırlanmış iki partiyalı qanun layihəsi, Rusiyadan neft, qaz, uran və digər məhsulları alan istənilən ölkəyə qarşı ikinci dərəcəli tariflərin tətbiqini nəzərdə tutur.

“Prezident Trampın və onun komandasının Ukraynada Putinin barbar müdaxiləsi ilə başlanan müharibənin ədalətli və şərəfli yolla başa çatdırılması istiqamətində göstərdiyi səyləri yüksək qiymətləndirirəm. Mənim 60-a yaxın həm-müəlliflə birgə təqdim etdiyim iki partiyalı qanun layihəm var ki, Rusiyadan neft, qaz, uran və digər məhsullar alan istənilən ölkəyə qarşı ikinci dərəcəli tariflər tətbiq olunmasını nəzərdə tutur. Əgər Rusiya dürüst, ədalətli və uzunmüddətli sülhə razılaşmasa, Senat bu addımı atmağa hazırdır və bunu demək olar ki, tam səs çoxluğu ilə edəcək,” – deyə Lindsi Qraham qeyd edib.

Xatırladaq ki, ABŞ prezidenti Donald Tramp sosial şəbəkəsində yazmışdı ki, Putinin Ukraynanın yaşayış məntəqələrinə son hücumları onun müharibəni bitirmək istəmədiyini göstərə bilər və ona qarşı “bank” və ya “ikinci dərəcəli sanksiyalar” vasitəsilə fərqli yanaşma sərgilənməsi lazım ola bilər.