Səhiyyə Nazirliyi kistik fibroz xəstəliyi olan pasiyentlər üçün “Trikafta” adlı innovativ dərmanı satın alacaq

Səhiyyə Nazirliyi kistik fibroz xəstəliyi olan pasiyentlər üçün “Trikafta” adlı innovativ dərmanı satın alacaq, preparatın istehsalçısı olan Amerikanın “Vertex Pharmaceuticals” biofarmasevtika şirkəti ilə müqavilə artıq bağlanılıb. Bu barədə məlumatı Səhiyyə Nazirliyi yayır.

Qurumun məlumatına əsasən, ABŞ-nin Qida və Dərman Administrasiyası (FDA) və Avropa Dərman Agentliyi (EMA) tərəfindən genetik mutasiyaları təsdiqlənmiş göstərişlərə uyğun gələn iki və daha yuxarı yaşdan olan pasiyentlər üçün dərmana icazə verilib.

“Preparat xəstəliyin genetik səbəbinə birbaşa təsir edir, ağciyərin funksional göstəricilərinin kəskin yaxşılaşmasını və irəliləyən zədələnmənin dayanmasını təmin edir. Nəticədə, infeksion fəsadların riski, xəstəxanaya yerləşdirilmə ehtiyacı və ağciyər köçürülməsinin zərurəti əhəmiyyətli dərəcədə azalır. Dərman qidalanma statusunu və həyat keyfiyyətini əhəmiyyətli dərəcədə yaxşılaşdırır, bu da pasiyentlərə daha fəal, uzunömürlü və dolğun həyat sürməyə imkan verir. Kistik fibroz adətən uşaq yaşda üzə çıxan, əsasən ağciyərləri və həzm sistemini zədələyən irəliləyən genetik xəstəlikdir. Tənəffüs yollarının infeksiyaları tez-tez baş verir, zaman ərzində isə ağciyərlərin funksiyası və sağlamlıq vəziyyəti əhəmiyyətli dərəcədə pisləşir. Mütəmadi olaraq müalicə ehtiyacı və xəstəliyin səbəb olduğu məhdudiyyətlər uşaqların gündəlik həyatına və inkişafına mühüm təsir göstərir. Müvafiq olaraq, müasir terapiyanın əlçatanlığı xüsusi əhəmiyyət kəsb edir. “Trikafta” 2025-ci ilin sentyabrında Ümumdünya Səhiyyə Təşkilatının Mühüm Dərmanlar Siyahısına (WHO Essential Medicines List) daxil edilib, bu da onun kistik fibrozun müasir müalicəsindəki mühüm rolunu təsdiqləyir” – yayılan məlumatda deyilir.