Şanxaydan Tbilisiyə ilk birbaşa aviareys yerinə yetirilib
Çinin ən böyük və aparıcı aviaşirkətlərindən biri “China Eastern Airlines” Gürcüstan aviasiya bazarına daxil olub və tarixdə ilk dəfə Tbilisi ilə Şanxay arasında birbaşa müntəzəm reys yerinə yetirib.
Təyyarənin göyərtəsində 274 sərnişin var. Onların arasında Gürcüstan haqqında material hazırlayacaq Çinin media vasitələrinin nümayəndələri, bloqerlər və vloqerlər də var.
Aviaşirkət birbaşa uçuşları həftədə üç dəfə — çərşənbə, cümə və bazar günləri yerinə yetirəcək.
Şanxay və Tbilisi arasında birbaşa uçuşların başlaması haqda qərar Gürcüstanın iqtisadiyyat və davamlı inkişaf naziri Mariam Kvrivişvili ilə Çinin “China Eastern Airlines” aviaşirkətinin rəhbərlərinin görüşündə qəbul edilib. Bu görüş nazirin cari ilin aprel ayında Çin Xalq Respublikasına rəsmi səfəri çərçivəsində baş tutub.
2025-ci ildə Gürcüstan Çindən 100 470 beynəlxalq ziyarətçi qəbul edib, bu da Çin bazarından olan tələbin sabit şəkildə artdığını göstərir.
“China Eastern Airlines” Gürcüstanla Çin arasında birbaşa müntəzəm uçuşlar yerinə yetirəcək üçüncü ən böyük Çin aviaşirkətidir. Gürcüstan aviasiya bazarında artıq Çinin daha iki nəhəng aviaşirkəti – “Air China” və “China Southern Airlines” uğurla fəaliyyət göstərir. Hər iki aviaşirkət Tbilisi və Urumçi arasında müntəzəm reyslər yerinə yetirir, “Air China” isə sərnişinlərə Urumçidən keçməklə Pekinə səyahət etmək imkanı da təklif edir.