Bütün Gürcüstanı Milad bayramı münasibətilə təbrik edirəm, bu gün xristian dünyası üçün mühüm gündür – bu haqda Gürcüstan Parlamentinin sədri Şalva Papuaşvili bildirib.

Parlamentin sədri deputatlarla birlikdə Respublika meydanında Alilo yürüşünə qatılıb.

Şalva Papuaşvili Gürcüstan vətəndaşlarını Milad və Yeni il münasibətilə bir daha təbrik edib, ölkəyə sülh və uğurlu il arzulayıb və milli maraqlar ətrafında daha çox birləşməyin əhəmiyyətini də vurğulayıb.

Parlamentin sədri patriarxın builki Milad məktubunda yer alan və insanlar arasında sevgini təbliğ edən, vətəndaşları millətin və cəmiyyətin mənafeyi naminə birləşməyə çağıran mesajlarından danışıb.

“Dünən Milad liturgiyasında iştirak etdik, patriarxın məktubunu və patriarxın bir tərəfdən insanlar arasında sevgini nəzərdə tutan əsas prinsipi, digər tərəfdən də hər kəsin öz qonşusunu düşünməli olmasını vurğuladığı mesajlarını dinlədik, çünki təkəbbür, eqoizm insanların ümumi rifah haqqında düşünməsinə maneə olan şeydir” – Şalva Papuaşvili bildirib və patriarxın Milad məktubunun bu müraciətini hamının paylaşacağına ümid etdiyini deyib.

Alilo yürüşü Birinci Respublika Meydanından başladı və Üçlük kafedral məbədində başa çatdı. İanələr isə uşaq evləri, penitensiar müəssisələr və qocalar evləri arasında paylanacaq.

Ümumi Gürcüstanın katolikos-patriarxı II İlianın xeyir-duası ilə 2000-ci ildən Tbilisidə Milad bayramı şərəfinə təntənəli Alilo yürüşü xüsusi miqyasda qeyd olunur. Bu il Alilo yürüşü ənənəsinin 25 ili tamam oldu.

Məlumatı Gürcüstan Parlamentinin mətbuat xidməti yayır.