Gürcüstan parlamentinin sədri Şalva Papuaşvilinin sözlərinə görə, o, Türkiyədə keçirilən Parlamentlərarası İttifaqın (IPU) 152-ci Assambleyasında çıxışı zamanı xarici müdaxilə təhlükələri və bu məsələdə vahid yanaşmanın vacibliyindən danışacaq.

Onun sözlərinə görə, həmçinin Avropa İttifaqına üzv ölkələrin nümayəndələri ilə Gürcüstan–Aİ münasibətləri və mövcud təəssüf doğuran vəziyyət ətrafında müzakirələr aparılacaq.

“Bu gün assambleyanın əsas günüdür və bizə ikitərəfli formatda görüşlər keçirmək imkanı yaradılacaq. O cümlədən, Lüksemburq parlamentinin sədri və region ölkələrinin parlament rəhbərləri ilə görüşlər planlaşdırılıb. Assambleyada çıxış etmək imkanım da olacaq. Konfransda əsas mesajımız bütün ölkələrdə aydın görünən yeni təhlükələrlə bağlıdır. Hər bir ölkə öz milli maraqlarını xarici müdaxilələrdən qorumağa çalışır və bu baxımdan vahid yanaşmanın vacibliyini vurğulayacağam ki, hibrid xarici müdaxilə təhdidlərinə eyni cür cavab verilsin.

Avropa İttifaqına üzv ölkələrin nümayəndələri ilə Gürcüstan–Aİ münasibətləri, eləcə də Brüsseldən gördüyümüz təəssüf doğuran yanaşma müzakirə olunacaq. Təəssüf ki, dialoq rejimi bağlanır və getdikcə daha güclənən birtərəfli direktiv yanaşma müşahidə olunur. Buna görə də vacibdir ki, səsimizi Aİ-yə üzv ölkələrin parlamentlərinə çatdıraq və göstərək ki, Brüsselin bu gün Gürcüstan və namizəd ölkələrə münasibətdə seçdiyi yol Avropa dəyərlərindən tamamilə uzaqdır. Vacibdir ki, Avropa parlamentləri də bu məsələdə öz mövqelərini ortaya qoysunlar”, – deyə Şalva Papuaşvili bildirib.