Gürcüstan Parlamentinin sədri Şalva Papuaşvili Türkiyə Böyük Millət Məclisinin sədri Numan Kurtulmuş ilə görüşüb. Parlamentin mətbuat xidmətinin məlumatına əsasən, türk lider Şalva Papuaşvilini yenidən parlamentin sədri seçilməsi münasibətilə təbrik edib və qeyd edib ki, xalqın iradəsi alidir, hamı seçkilərin nəticələrinə hörmətlə yanaşmalıdır və bu, gələcək inkişafın əsasına çevrilməlidir.

Tərəflər Gürcüstan və Türkiyəni çoxillik səmərəli əməkdaşlıq və xalqlararası dostluğun birləşdirdiyini qeyd ediblər.

Görüşdə parlament əlaqələrinin gələcək inkişafı haqda danışıblar. Razılaşıblar ki, yaxın vaxtlarda sədrlər səviyyəsində Gürcüstan-Türkiyə-Azərbaycan üçtərəfli əməkdaşlıq formatı yaradılacaq.

Numan Kurtulmuş Şalva Papuaşvilini Türkiyəyə dəvət edib.

Tərəflər regionda və dünyadakı cari hadisələri, o cümlədən ABŞ-nin yeni prezidentinin administrasiyası ilə bağlı olan Ukraynada müharibənin bitməsi üçün sülh təşəbbüslərini müzakirə ediblər.

Şalva Papuaşvili türk həmkarına Gürcüstanın suverenliyi və ərazi bütövlüyünə dəstəyə görə təşəkkür edib. Tərəflər Gürcüstan və Türkiyə arasında strateji tərəfdaşlığın dərinləşdirilməsi barədə razılığa gəliblər.

Görüş Özbəkistan Respublikasının paytaxtı Daşkənddə davam edən Parlamentlərarası İttifaqın 150-ci Assambleyası çərçivəsində keçirilib.

Gürcüstan Parlamentinin sədrinin rəhbərlik etdiyi parlament nümayəndə heyətinin tərkibinə daxildir: Xarici Əlaqələr Komitəsinin sədri Nikoloz Samxaradze və Ətraf Mühitin Mühafizəsi və Təbii Resurslar Komitəsinin sədri Maia Bitadze.