Gürcüstan Parlamentinin sədri Şalva Papuaşvili Litva tərəfindən Gürcüstanın daha on vətəndaşına viza sanksiyalarının tətbiq edilməsinə münasibət bildirir.

Şalva Papuaşvilinin sosial şəbəkədə yazdığı kimi, Baltikyanı ölkələrin siyasi elitasının hərəkətləri postsovet fenomenidir.

“Sən demə, Baltikyanı ölkələrin siyasi elitası gürcülərə qarşı necə kin bəsləyirmiş ki, fürsətdən istifadə etdilər və artıq az qala lototronla hədəf seçirlər.

Baltikyanı ölkələrin siyasi elitasının əsasən kommunist nomenklaturasının ailələrindən ibarət olduğunu nəzərə alsaq, bu kin açıq-aydın Sovet İttifaqından qalıb.

Nəsə bir məqamda SovLab xarici sifarişlə hakimiyyətin devrilməsinin yenidən uğursuz olduğunu başa düşəndə, yəqin bu postsovet fenomenini də araşdıracaq” – Şalva Papuaşvili “Facebook”da yazır.

Litvanın Miqrasiya Departamentinin veb saytında bu gün dərc olunan məlumata əsasən, Litva Gürcüstanın daha on vətəndaşına viza sanksiyaları tətbiq edib. Onların Litvaya girişi qadağan olunub.