Marta Kosun bəyanatında Gürcüstan hakimiyyətinin gürcü xalqını dinləməli olduğundan bəhs olunurdu. Gürcü xalqının nə istədiyi barədə onun heç bir təsəvvürü yoxdur, başa düşmür – bu haqda Gürcüstan Parlamentinin sədri Şalva Papuaşvili bildirib.

Papuaşvili, bunun gürcü xalqına qarşı hörmətsizlik və Avropa bürokratiyasının tutduğu ən təhlükəli yol olduğunu bildirib.

“Unutmayaq ki, bu, partiyası “ALDE”nin terrorçu ilə əməkdaşlıq etdiyi Marta Kosdur. “ALDE” və Marta Kos terrorçu ilə aralarına məsafə qoyana qədər onların bütün sözləri qeyri-ciddidir. Bu günə qədər “ALDE” terrorçu ilə əməkdaşlıq edən və silahdaşı terrorçu olan partiyadır. Beləliklə, məsələmiz terrorçu ilə əməkdaşlıq edən partiyanın üzvü olan Avropa Komissarı ilə olanda, bu məsələni ciddi şəkildə müzakirə edə bilmərik. Bir məsələni, gürcü xalqının Brüsselə bir daha göstərməli olduğumuz bir qırmızı xətti ayırmaq istərdim. Bu, onların Gürcüstana olan qəyyumluq münasibəti cəhdidir.

Marta Kosun bəyanatında Gürcüstan hakimiyyətinin gürcü xalqını dinləməli olduğundan bəhs olunurdu. Bildiyim qədəri ilə, Kos rəsmi olaraq Gürcüstanda olmayıb, şəxsi səfərlə olub-olmadığını bilmirəm. Marta Kos Gürcüstanda bircə dəfə, bizim üzərimizdən uçub Ermənistana və Bakıya səfər edərkən olub. Gürcü xalqının nə istədiyi barədə Marta Kosun heç bir təsəvvürü yoxdur, başa düşmür. Brüsselin bürokratı bu cür mənəvi kürsü, qəyyumluq münasibəti ilə gürcü xalqının hakimiyyəti ilə danışmaq hüququnu özünə tanıyanda, bu, gürcü xalqına qarşı hörmətsizlikdir, bizi aşağı keyfiyyətli insanlar hesab etməkdir, guya biz gürcülər özünü idarə edə, hakimiyyətini seçə və maraqlarımızı təmsil edən şəxsləri hakimiyyətə gətirə bilmirik. Bu, Avropa bürokratiyasının tutduğu ən təhlükəli yoldur. Bu barədə bir neçə dəfə danışmışam, lakin görürəm ki, bütün bunlar yetərli deyil və hələ də davam edirlər. Buna görə də, bu gündən etibarən bu məsələyə xüsusi diqqət göstərəcəyəm.

Gürcü xalqı adından danışan bütün əcnəbilər gürcü xalqının dostu deyil, o, gürcü xalqının ondan bir şəkildə aşağı olduğunu düşünən bir insandır. Gürcüstanın əhalisi 2012-ci ildə, 2020-ci ildə, 2024-cü ildə “Gürcü Arzusu”nu dəstəkləyib və eyni sayda, bir milyon yüz min nəfər indilərdə, iki ay əvvəl, yerli özünüidarəetmə seçkilərində Gürcüstan hakimiyyətini dəstəkləyib. Marta Kos nə deyir, bu insanlar insan deyilmi? Onlar bir növ aşağı təbəqəli insanlardır və yüksək kastanın nümayəndələri bizimlə, aşağı kastanın nümayəndələri ilə danışırlar” – Şalva Papuaşvili bildirib.

Məlumat üçün bildirək ki, genişlənmə məsələləri üzrə Avropa Komissarı Marta Kos bəyan edib: “Ümid edirəm ki, xalqın dəstəyi ilə Gürcüstan hakimiyyəti, hökumət Avropa kursuna qayıdacaq, lakin bu onların əlindədir”.