Şalva Papuaşvili: Koordinasiyalı kampaniya aparılır ki, Gürcüstan öz ərazilərini Rusiyaya təhvil versin. Bunu bizə damla-damla qəbul etdirməyə çalışırlar. Ölkənin ərazi bütövlüyünü heç bir başqa məqsədə dəyişməyəcəyik

Şalva Papuaşvili: Gürcüstanın ərazilərini Rusiyaya təhvil verməsi və ərazi bütövlüyündən imtina etməsi üçün koordinasiyalı kampaniya aparılır
“Gürcüstanın öz ərazilərini Rusiyaya təhvil verməsi, ərazi bütövlüyündən və ölkənin birləşdirilməsi məqsədindən imtina etməsi üçün koordinasiyalı kampaniya aparılır. Bunu bizə damla-damla, tədricən qəbul etdirməyə çalışırlar”, – Gürcüstan parlamentinin sədri Şalva Papuaşvili bildirib.
Papuaşvilidən Gürcüstanın sabiq prezidenti Mixeil Saakaşvilinin Abxaziya ilə bağlı açıqlaması barədə soruşulub. Saakaşvili bildirib ki, “Abxaziya üzərində nəzarətin bərpası yolunun maksimum 50 min abxazın barışdırılmasından keçdiyini düşünən şəxsin başında fikir əvəzinə xaşlama var”.
Papuaşvilinin sözlərinə görə, ölkənin iki əsas milli məqsədi xalqın rifahı və ölkənin birləşdirilməsidir və bunlardan daha üstün heç bir başqa məqsəd yoxdur.
“Son dövrlərdə ölkəmizin ərazi bütövlüyünə qarşı yönəlmiş açıq kampaniyanın şahidi oluruq. Bunu xüsusi vurğulamaq istəyirəm. Əvvəlcə Baramidzenin açıqlaması oldu. O, 1990-cı illərdəki qarşıdurmalar zamanı müharibə cinayətlərində Gürcüstanı və gürcü əsgərlərini günahlandırdı.
Daha sonra Qvaramiya bunu tarixi travma adlandırdı və nədənsə Ermənistanla paralel apardı. Onun sözlərinə görə, Ermənistan Qarabağ travmasından azad olaraq qarşısında yeni perspektivlər açdığı kimi, biz də bu travmadan azad olmalıyıq. Bununla onların ölkənin ərazi bütövlüyü ilə bağlı baxışlarının nə olduğu açıq şəkildə ortaya çıxdı.
Bu, ümumilikdə kollektiv ‘Milli Hərəkat’ın, o cümlədən hakimiyyətdə olduğu dövrdə də həyata keçirdiyi xəttin davamıdır. Saakaşvili deyirdi ki, abxazlar bizə nifrət edir və bunun qarşısını almaq mümkün deyil, barışıq siyasətinin heç bir mənası yoxdur. Bokeriyanın açıqlamasına görə, barışıq siyasəti faydasızdır. Qvaramiyanın fikrincə isə bu, inkişafımızı bloklayan travmadır, ondan qurtulmalı və gələcəyə baxmalıyıq.
Bütün bunlar göstərir ki, Gürcüstanın öz ərazilərini Rusiyaya təhvil verməsi, ərazi bütövlüyündən və ölkənin birləşdirilməsi məqsədindən imtina etməsi üçün koordinasiyalı kampaniya aparılır.
Bunu bizə belə, damla-damla, yavaş-yavaş qəbul etdirməyə çalışırlar. Daha sonra isə Qvaramiyanın Ermənistanla bağlı apardığı paralellərdə olduğu kimi, bunun müqabilində müəyyən perspektivlərin açılacağı fikrini irəli sürəcəklər.
Eyni şeyi Ukraynaya da deyirlər – ərazilərlə bağlı kompromisə getsin və bununla onun inkişafı üçün daha böyük perspektivlər açılsın. Eyni yanaşmanı Dnestryanı bölgə məsələsində Moldovaya da təklif edirlər.
İndi isə görünür, növbə bizə çatıb. Buna görə də elə indidən çox sərt cavab verilməlidir: ölkəmizin bütövlüyü ilə bağlı heç bir məqsəd naminə heç bir kompromisə gedilməyəcək.
Bir daha vurğulamaq lazımdır ki, ölkəmizin iki əsas milli məqsədi var – xalqımızın rifahı və ölkənin birləşdirilməsi. Bundan üstün heç bir başqa məqsəd yoxdur. Beləliklə, ölkəmizin ərazi bütövlüyünü heç bir başqa məqsədə dəyişməyəcəyik”, – Şalva Papuaşvili bildirib.