Gürcüstan parlamentinin sədri Şalva Papuaşvilinin sözlərinə görə, İstanbul səfəri çərçivəsində o, region ölkələrinin parlament sədrləri ilə görüşlər keçirəcək.

Papuaşvilinin qeyd etdiyinə görə, o cümlədən Ermənistan və Azərbaycan parlament sədrləri ilə də görüş planlaşdırılır və bu görüşlərdə regionun əhəmiyyəti müzakirə olunacaq.

“Əlbəttə ki, region parlamentlərinin sədrləri ilə görüşlər olacaq. Bu gün Ermənistan və Azərbaycan parlament sədrləri ilə görüşəcəyəm və geniş regionda müşahidə etdiyimiz beynəlxalq təhlükəsizlik çağırışları fonunda regionun əhəmiyyətindən danışacağıq. Azərbaycan və Ermənistan arasında sülh sazişinin paraflanması, ikitərəfli münasibətlərin irəliləməsi bizə ümid verir ki, Şərqlə Qərb arasında körpü rolunu oynayan regionumuz gələcəkdə də sabit şəkildə öz funksiyasını yerinə yetirəcək”, – deyə Şalva Papuaşvili bildirib.

Gürcüstan parlamentinin sədri Şalva Papuaşvili Türkiyə Respublikasının İstanbul şəhərinə səfərə dünən yola düşüb. Parlament sədrinin rəhbərlik etdiyi nümayəndə heyətinə xarici əlaqələr komitəsinin sədri Nikoloz Samxaradze və ətraf mühitin mühafizəsi və təbii ehtiyatlar komitəsinin sədri Maya Bitadze daxildir.