Parlamentin sədri Şalva Papuaşvili Ermənistan Respublikasının Gürcüstandakı fövqəladə və səlahiyyətli səfiri Aşot Smbatyanla görüşüb. Məlumatı parlamentin mətbuat xidməti yayır.

Onların məlumatına əsasən, tərəflər Gürcüstan və Ermənistan arasında tarixən möhkəm dostluq və səmərəli əməkdaşlıqdan danışıblar. Parlament əməkdaşlığının daha da dərinləşdirilməsinin əhəmiyyətinə diqqət yetirilib.

Tərəflər hər iki ölkədə cari siyasi hadisələri müzakirə ediblər. Ermənistanın Qərblə əlaqələrin möhkəmləndirilməsində artan marağına toxunulub, o cümlədən Ermənistanla Amerika Birləşmiş Ştatları arasında Strateji Tərəfdaşlıq Xartiyasının imzalanması xüsusilə qeyd olunub.

Həmçinin, qeyd olunub ki, Gürcüstan-ABŞ və Ermənistan-ABŞ münasibətlərinin gələcək inkişafı ABŞ-ın yeni prezidenti Donald Trampdan əhəmiyyətli dərəcədə asılı olacaq.

Tərəflər görüşdə Cənubi Qafqazda mövcud vəziyyəti müzakirə ediblər və regional sülh və sabitliyin əhəmiyyətini vurğulayıblar.

Həmçinin, parlamentin sədri və Ermənistanın səfiri müğənni Şarl Aznavurun anadan olmasının 100 illiyinin Gürcüstanda layiqincə qeyd olunmasını vurğulayıblar.