Bu gün munisipalitetdə, şəhər və kənddə vətəndaşlarımızın öz nümayəndələrini seçmək imkanı var, əminəm ki, uğurlu, demokratik seçki günü olacaq – bu barədə parlamentin sədri Şalva Papuaşvili yerli seçkilərdə səs verdikdən sonra jurnalistlərə deyib.

O bildirib ki, munisipalitetlər əhali arasında ən çox etimad görən orqanlardır.

“Bu gün demokratik seçkilər günüdür. Öz seçimini etmək hər kəsin vətəndaşlıq borcudur. Biz yerli özünüidarəetmə orqanlarında nümayəndələrimizi seçirik. Bütün tədqiqatlara əsasən, munisipalitetlər əhalimiz arasında ən çox etimad görən orqanlardır, çünki munisipalitetlərimiz, merlərimiz, şəhər şurasının üzvləri vətəndaşlarımızla birbaşa təmasda olan, onların qayğılarını, sevinclərini bilən insanlardır. Beləliklə, bu gün hər bir munisipalitetdə, şəhərdə və kənddə vətəndaşlarımızın öz nümayəndələrini seçmək imkanı var. Əminəm ki, bu gün uğurlu, demokratik seçki günü olacaq.

Bu günlə keçən ilin oktyabrında başlamış seçki dövrü müəyyən mənada tamamlanır. Keçən il biz parlamenti və prezidenti seçdik, indi yerli özünüidarəetmə orqanlarını seçirik. Bununla seçkili orqanlar tam şəkildə komplektləşdiriləcək və 2028-ci ilə qədər Gürcüstan xalqın mandatına malik dövlət institutları ilə ölkəmizin çiçəklənməsi yolunda işləmək imkanına malik olacaq” – Papuaşvili bildirib.