Gürcüstan Parlamentinin sədri Şalva Papuaşvili Burundi Respublikası, Küveyt, Lesoto və Nepalın BMT-dəki daimi nümayəndələri ilə görüşüb.

Parlamentin mətbuat xidmətinin məlumatına əsasən, görüşdə BMT Nizamnaməsi və qaydalara əsaslanan beynəlxalq nizamın qorunmasının əhəmiyyətinə diqqət yetirilib.

“Bu il BMT-nin yaradılmasının 80 illiyinin qeyd olunması faktına diqqət çəkilib. Müasir dünyada mövcud vəziyyəti nəzərə alaraq, BMT-də islahatların əhəmiyyəti qeyd edilib.

Ölkələr arasında ikitərəfli və çoxtərəfli münasibətlərin inkişafında parlament diplomatiyasının roluna toxunulub.

Həmçinin, tərəflər Gürcüstanın işğal olunmuş bölgələrində mövcud vəziyyət barədə danışıblar. BMT-dəki daimi nümayəndələr Gürcüstanın məcburi köçkünlərlə bağlı siyasətini müsbət qiymətləndiriblər. Həmçinin, onlar uğurlu islahatların həyata keçirilməsi baxımından Gürcüstanın dəyərli təcrübəsini vurğulayıblar” – parlament tərəfindən yayılmış məlumatda qeyd olunub.