Sabah Qrenlandiyada parlament seçkiləri keçiriləcək

 
Sabah Qrenlandiyada parlament seçkiləri keçiriləcək – bu haqda “Reuters” yazır. Seçki məntəqələri yerli vaxtla saat 11:00-da açılacaq və saat 22:00-da bağlanacaq. “Reuters”in yazdığı kimi, “exit-poll” olmayacaq və nəticələr martın 12-də bilinəcək.

Qrenlandiyanın 57 000 vətəndaşından təxminən 40 500-ü səsvermə hüququna malikdir. 2021-ci ildə keçirilən seçkilərdə təxminən 27 000 insan iştirak edib.

Qrenlandiya Parlamentində cəmi 31 yer var, çoxluq əldə etmək üçün isə 16 yer lazımdır.

Qrenlandiyanın hakim solçu sosialist partiyası – “Inuit Ataqatigiit” baş nazir Mute Eqedenin rəhbərliyi ilə iqtisadi və siyasi cəhətdən müstəqil Qrenlandiyanı dəstəkləyir, lakin buna nail olmaq üçün hələ plan hazırlamayıb. Hazırda partiya Qrenlandiya Parlamentində 11 yerə sahibdir.

Erik İensenin rəhbərliyi ilə “Siumut” Sosial Demokrat Partiyası Qrenlandiyanın tədricən Danimarkadan ayrılmasını dəstəkləyir və əhaliyə növbəti 4 il ərzində referendum keçirməyi təklif edir. “Siumut” hazırda Qrenlandiya Parlamentində on yerə malikdir.

Pele Broeberqin rəhbərliyi ilə solçu “Naleraq” partiyası ən böyük müxalifət partiyasıdır və Qrenlandiyanın tam müstəqilliyini qətiyyətlə dəstəkləyir. “Naleraq” hazırda parlamentdə beş yerə malikdir.