Rusiyanın raket hücumu nəticəsində Zaporojiedə 3 nəfər həlak olub, 17 nəfər isə xəsarət alıb, özəl klinika dağılıb

 
Rusiya tərəfindən Ukraynaya raket hücumu nəticəsində Zaporojie şəhərində 3 nəfər həlak olub, 17 nəfər isə xəsarət alıb, özəl klinika dağılıb – bu haqda regionun qubernatoru İvan Fedorov deyib.

Fedorovun dediyi kimi, dağıntılar altında insanlar var. Hadisə yerində axtarış-xilasetmə işləri aparılır.

Ukraynanın Prezidenti Volodimir Zelenski hadisəyə münasibət bildirib.

“Hazırda Zaporojiedə Rusiyanın amansız raket zərbəsindən sonra xilasetmə əməliyyatı aparılır. Hazırda 3 nəfərin həlak olduğu bilinir. Ailələrinə və yaxınlarına başsağlığı verirəm. Bu zərbələrin hər biri bizim hava hücumundan müdafiə imkanlarımızı gücləndirməli olduğumuzun sübutudur. Dünyanın bunu etmək üçün kifayət qədər sistemləri var. Məsələ tamamilə siyasi qərarlardan – ABŞ administrasiyasının, avropalı liderlərin və digər tərəfdaşların qərarlarından asılıdır. Bunlar minlərlə insanı xilas edə biləcək qərarlardır” – Zelenski yazır.