Rusiya və Azərbaycan xarici işlər nazirlikləri birgə bəyanat yayıblar, bəyanatda 2024-cü ilin dekabrında Azərbaycan Hava Yollarına məxsus sərnişin təyyarəsinin qəzaya uğramasının “nəticələrini müvafiq şəkildə tənzimlədiklərini” qeyd ediblər.

Bəyanatda tərəflərin digər məsələlərlə yanaşı, təyyarə qəzası ilə əlaqədar kompensasiya ödəmək məsələsini də həll etdiyi yazılıb, lakin məsələnin necə həll edildiyi konkretləşdirilməyib.

“Atılan addımlar müttəfiqlik qarşılıqlı fəaliyyəti çərçivəsində faydalı əməkdaşlığın daha da inkişaf etdirilməsi istiqamətində tərəflərin ortaq səylərini təsdiqləyir” – Rusiya və Azərbaycan xarici işlər nazirlikləri bəyan edirlər.

Sənəddə həmçinin təyyarənin “Rusiya hava məkanında hava hücumundan müdafiə sisteminin qeyri-ixtiyari fəaliyyəti nəticəsində” qəzaya uğradığı qeyd olunub.

Bakıdan Qroznıya uçan Azərbaycan Hava Yollarına məxsus “Embraer E190” təyyarəsi 2024-cü ilin dekabrın 25-də Qazaxıstanın Aktau şəhərində qəzaya uğrayıb. Təyyarə qəzasında 38 nəfər həlak olub, 29 nəfər xilas olub.

Təyyarə Ukrayna dronlarının hücumu fonunda Xəzər dənizi vasitəsilə Qazaxıstana yönləndirildikdən sonra qəzaya uğrayıb. Qəzadan sonra Moskva ilə Bakı arasında münasibətlər gərginləşib, o cümlədən Azərbaycanın Rusiyadan məsuliyyətini etiraf etməsini tələb etməsi səbəbindən.

Rusiya Prezidenti Vladimer Putin 2025-ci ilin oktyabrında Azərbaycan Hava Yollarına məxsus təyyarənin Rusiya hava hücumundan müdafiə sistemi tərəfindən vurulduğunu etiraf edib. O, Azərbaycanın lideri İlham Əliyevlə görüşündə fəlakətin səbəbinin Rusiya hava hücumundan müdafiə sistemindəki “texniki nasazlıq” olduğunu və atılan iki raketin “təyyarəyə birbaşa dəymədiyini”, əksinə ondan təxminən on metr aralıda partladığını deyib.