Rusiya qüvvələri Xarkovun mərkəzinə aviasiya bombaları ilə hücum ediblər. Yerli hakimiyyətin məlumatına əsasən, 33 nəfər yaralanıb.

Zərbələrdən biri çoxmərtəbəli yaşayış binasının yaxınlığına edilib. 15 avtomobil məhv edilib, həmçinin mülki infrastruktura ziyan dəyib.

Ukrayna Prezidenti Volodimir Zelenski yaralananlar arasında uşaqların da olduğunu bildirib.

“Heç bir hərbi hədəf olmadan, tamamilə mənasız zərbələr. Biz görürük ki, bu, Rusiyanın yeganə istəyidir – təcavüz və qətliamları davam etdirmək. Ona görə də müdafiədə dəstəyə ehtiyacımız var – güclü hava hücumundan müdafiə, silah istehsalının genişləndirilməsi. Bütün bunlar insanların həyatını qorumağa kömək edəcək. Biz tərəfdaşlarla əməkdaşlığa ümid edirik və artıq kömək etməyə hazır olan hər kəsə minnətdarıq” – Zelenski yazır.