Rusiya gecə Kiyev və Odessa vilayətlərinə hücum edib

Ötən gecə Rusiya Kiyev və Odessa vilayətlərinə raketlər və dronlarla hücum edib.

Ukrayna Hərbi Hava Qüvvələri, Rusiya tərəfinin hava hücumunu “Iskander-M” və “S-400” tipli raketlərlə yanaşı, 217 dronla həyata keçirdiyinə dair məlumat verir.

Hücum zamanı “Banderol” tipli hədəf üzərində dövr edən döyüş sursatından da istifadə olunub.

Ukrayna Hərbi Hava Qüvvələrinin məlumatına əsasən, onlar 182 dronu, üç raketi və 6 ədəd hədəf üzərində dövr edən döyüş sursatını məhv etməyi və ya radioelektron mübarizə vasitələri ilə zərərsizləşdirməyi bacarıblar.

Qurumdan qeyd ediblər ki, Rusiya hava hücumu vasitələrinin 41 məkana zərbə endirdiyi təsbit edilib, bununla yanaşı, dəf edilən hədəflərin qalıqları 12 məkana düşüb.

Ballistik raketlərlə Kiyevin Darnitsa rayonunda yerləşən dəmir yolu obyekti bombalanıb. Hadisə nəticəsində bir dəmir yolu əməkdaşı həyatını itirib.