Almaniya kansleri Fridrix Mers transatlantik tərəfdaşlığın əhəmiyyətindən danışaraq bildirib ki, bu tərəfdaşlıq onun üçün şəxsi olaraq da xüsusilə dəyərlidir.

Mers qeyd edib ki, Almaniyanın kursu hələ də güclü NATO və etibarlı transatlantik tərəfdaşlığa yönəlib. Kansler bu barədə Münsterdəki təlim bazasında hərbçilərlə görüş zamanı danışıb.

“Bundesverin burada, Münstərdə əldə etdiyi nəticələr yalnız təəccüblü deyil, həm də güclü və vahid NATO-ya əvəzsiz töhfədir. Biz burada və Almaniyanın digər strateji bölgələrində ABŞ və NATO-dakı müttəfiqlərimizlə birgə çalışırıq. Bildiyiniz kimi, transatlantik tərəfdaşlıq bizim üçün, mənim üçün şəxsi olaraq da xüsusilə dəyərlidir,” – Mers bildirib. O əlavə edib ki, bu qarşılıqlı faydalıdır və transatlantik əlaqələrin gücləndirilməsi üçün edilir.

Eyni zamanda, ABŞ prezidenti Donald Tramp bildirib ki, onun administrasiyası Almaniyadakı ABŞ hərbi kontingentinin azaldılmasını nəzərdən keçirir. Məlumata görə, ABŞ-ın Avropadakı hərbi personalı təxminən 68 000 nəfərdir və onların 36 400-ü Almaniyada yerləşir.