Rospotrebnadzor Ermənistanın mineral suyu olan “Jermuk”un Rusiyaya idxalını dayandırıb.

Qərarla bağlı Rusiya dövlət agentliyi məlumatı Avrasiya İqtisadi Komissiyasına və Avrasiya İqtisadi İttifaqına üzv ölkələrin səlahiyyətli qurumlarına təqdim edib.

Bildirilir ki, Rospotrebnadzor “Jermuk”un bütün partiyalarının Rusiyaya idxalı və paylanmasını müvəqqəti sanitar tədbir kimi dayandırıb. Səbəb kimi məhsulun etiketdə göstərilən məlumatlara uyğun olmaması qeyd olunub. Quruma görə, məhsulun müalicəvi xüsusiyyətləri barədə yanlış məlumat istehlakçıları çaşdıra bilər və bu da səmərəsiz müalicəyə və sağlamlığın pisləşməsinə səbəb ola bilər.

Aprelin sonunda Rospotrebnadzor artıq “Jermuk”un bəzi partiyalarının idxalını və satışını dayandırmışdı. Rusiya mediasının məlumatına görə, yoxlamalar zamanı suda bikarbonat, xlorid və sulfat ionlarının həddindən artıq miqdarı aşkarlanıb.