Robert Golob, Slovenia-nın hazırkı baş naziri, partiyası “Azadlıq Hərəkatı”nın parlament seçkilərində minimal üstünlüklə qalib gəlməsinə baxmayaraq, yeni hökumət formalaşdırmaq üçün tərəfdaş tapa bilmədiyini bildirib.

Medianın məlumatına görə, Sloveniya prezidenti Nataša Pirc Musar ilə danışıqlardan sonra Golob açıqlayıb ki, “Azadlıq Hərəkatı” müxalifətə keçməyi planlaşdırır.

Golob potensial sağ-mərkəzçi koalisiyanı “fırıldaqçılar koalisiyası” adlandırıb və onun uzunömürlü olmayacağını qeyd edib.

“Biz müxalifətdə işləməyə hazırlaşırıq və artıq bu gündən hüquqi dövlət prinsiplərini qətiyyətlə müdafiə edəcəyimizi bəyan edirik. Digərlərindən də eyni yanaşmanı gözləyirik”, – deyə o bildirib və deputat olaraq qalacağını təsdiqləyib.

Seçkilərin nəticələrinə görə, Golobun liberal “Azadlıq Hərəkatı” partiyası parlamentdə 29 mandat qazanıb ki, bu da Janez Janša-nın rəhbərlik etdiyi “Sloveniya Demokratik Partiyası”ndan bir mandat çoxdur.

Baş nazir parlamentə düşən bütün partiyalara – Sloveniya Demokratik Partiyası istisna olmaqla – koalisiyaya qoşulma təklif etsə də, razılıq əldə olunmayıb. Yerli medianın yazdığına görə, parlamentin spikeri vəzifəsinə prorus mövqeli partiyanın lideri Zoran Stevanović seçilib ki, bu da Robert Golob üçün hökumət qurma prosesini daha da çətinləşdirib.